Қозоғистон Республикаси суди урушга қарши қарашлари туфайли Россиядан қочиб, чегарани пиёда кесиб ўтган 16 ёшли россиялик ўсмир Тимур Турковни мамлакатдан чиқариб юбориш (депортация қилиш) ҳақида қарор қабул қилди. Бу ҳақда 15 декабрь, душанба куни The Insider нашри хабар берди. "Уральская неделя" нашрининг маълумотларига кўра, Турков сўнгги уч ой мобайнида Уралск шаҳридаги болалар учун ижтимоий марказда бўлган.
Суднинг кескин ҳукми
"Уральская неделя" эълон қилган видеода ўсмирнинг ўзи суд мажлиси Уралскдаги “2-шаҳар суди”да 5 декабрь куни бўлиб ўтганини, 8 декабрь куни эса уни Россияга мажбурий юбориш тўғрисида қарор чиқарилганини айтган.
- Айблов: Суд Тимур Турковни чегарани ноқонуний кесиб ўтишда айбдор деб топди.
- Жазо: Унга Қозоғистонга 5 йил муддатга кириш тақиқланди ва суд қарорига кўра, ўсмир Россияда яна 6 ой "эркинликни чеклаш" жазосини ҳам ўташи керак.
"Медиазона" нашри аниқлашича, Турков ишини Ғарбий Қозоғистон вилояти вояга етмаганлар ишлари бўйича ихтисослашган туманлараро суди кўриб чиққан.
Уруш тарғиботидан қочиш
“Просто журналистика” лойиҳаси ёзишича, Тимур Турков Коми Республикасининг Летка қишлоғида бобоси ва бувиси билан яшаган. Отаси оиладан кетган, онаси эса 3 йил аввал коронавирус оқибатлари сабаб вафот этган. 2025 йил ёзида ўсмир 9-синфни тугатган ва Россиядан чиқиб кетишга қатъий қарор қилган. Турковнинг айтишича, бу қарорга уни "уруш тарғиботи" мажбур қилган.
Тимур Турков: “Россияда мактаблар милитаризация қилиняпти. Айниқса бизда мактабда катта синф ўқувчиларини Россия–Украина урушида ҳалок бўлган ҳарбийларни дафн маросимларига жалб қилишарди. Қишлоғимиздан 11 ёки 12 киши ўлик қайтди, беш киши бедарак йўқолди”.
Ўсмир Россияга қайтса, сиёсий қарашлари туфайли хавф остида қолишдан қўрқишини айтган. “Россияда ҳамма нарса чекланяпти: эркин ва мустақил ОАВ чекланяпти, аҳоли устидан тотал назорат жорий қилиняпти”, — дея ўз хавотирларини қўшимча қилган у.
Пиёда ўтилган чегара
"Уральская неделя" хабар қилишича, Турков жорий йил сентябрь ойида Коми Республикасидан Қозоғистонга автостоп билан қочган. Унинг мақсади "РФнинг сиёсий йўналишига рози эмаслиги, 18 ёшга тўлгач урушга жўнатилиши мумкинлигидан қўрқиши туфайли қочқин мақомини сўраш" бўлган.
У чегарани 12 сентябрга ўтар кечаси 658-чегара белгиси яқинидан пиёда кесиб ўтган. Ўсмирнинг сўзларига кўра, у тун давомида тахминан 17 километр йўл босган, ҳатто бир пайт чарчоқ ва сувсизланиш сабаб ҳушидан кетган.
Кейинроқ Турковни қозоғистонлик чегарачилар топиб, ўтказиш пунктига олиб борган. У ерга Россия консулхонаси вакиллари, РФ чегара хизмати ходимлари ва ҳатто Россиянинг қўшни аҳоли пунктидан мактаб психологи ҳам келган. Турков журналистларга уни Россия ФСБ полковниги ҳам сўроқ қилганини айтган. Шундан сўнг ўсмир ижтимоий хизматларга муҳтож болалар марказига жойлаштирилган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
