Арманистонда 2026 йил 1 сентябрдан бошлаб янги тартиб жорий этилмоқда: энди ҳар бир туғилган бола учун бир марталик тўлов 500 минг драм (тахминан 1300 АҚШ доллари) қилиб белгиланди. Бу ҳақда “Armenia Today” нашри парламентнинг навбатдан ташқари йиғилишида қабул қилинган қонунчилик ташаббуси ҳақида маълум қилди.
Аввалги тартибга кўра, бир марталик нафақа оиладаги болалар сонига қараб турлича бўлган:
— биринчи ва иккинчи фарзанд учун 300 минг драм (786 доллар),
— учинчи ва тўртинчи бола учун 1 млн драм (2600 доллар),
— бешинчи ва ундан кейингилари учун 1,5 млн драм (3900 доллар) тўланган.
Янги ислоҳот барча болалар учун бир хил тўлов жорий этиб, тартибни соддалаштирмоқда.
Шу билан бирга, мамлакатда кўп болали оилаларни доимий қўллаб-қувватлаш дастури ҳам сақланиб қолади. Унга кўра, 2022–2025 йилларда туғилган оилалардаги учинчи ва ундан кейинги ҳар бир болага ойига 50 минг драм (131 доллар) тўлов бола олти ёшга тўлгунча давом этади.
Бундан ташқари, қонун 2026 йил 1 январдан кейин туғиладиган барча болалар учун мазкур тўловларни узлуксиз амалга оширишга ҳуқуқий замин яратади.
Эслатиб ўтамиз, яқинда Хитой ҳам туғилишни рағбатлантириш мақсадида 2026 йилдан туғруқ билан боғлиқ барча тиббий харажатларни давлат бюджети ҳисобидан қоплашни режалаштираётганини маълум қилган эди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
