Германиялик муҳандис Микаэла Бентҳаус пастки тана қисми фалаж бўлишига қарамасдан, суборбитал космик парвозни муваффақиятли амалга оширди. Бу ҳақда Deutsche Welle хабар берди.
Маълум қилинишича, парвоз Blue Origin’нинг New Shepard космик кемасида 20 декабрь куни бўлиб ўтган ва тахминан 11 дақиқа давом этган. 33 ёшли Бентҳаус шу тариқа белидан паст қисми фалаж бўлган ҳолда космосга чиққан дунёдаги илк инсон сифатида тарихга кирди. У 2018 йилда велосипедда юриш пайтида йиқилиб оғир жароҳат олган ва шундан бери ногиронлар аравачасида ҳаракатланади.
Қўнишдан кейин Бентҳаус ушбу парвозни ҳаётидаги энг унутилмас тажриба деб атади. Унинг таъкидлашича, инсон ҳеч қачон орзуларидан воз кечмаслиги керак, чунки уларни амалга ошириш учун ҳатто кичик имконият ҳам етарли бўлиши мумкин. Шунингдек, у болалигидан космосга қизиқиб келгани ва бунга “Юлдузлар жанги” фильми туртки бўлганини айтган.
New Shepard экипажи таркибига Бентҳаусдан ташқари яна беш нафар иштирокчи кирган. Улар орасида германиялик аэрокосмик муҳандис Ҳанс Кёнигсманн ҳам бўлиб, у 2021 йилгача SpaceX компаниясида фаолият юритган. Кёнигсманн парвоздан сўнг Ер ва унинг атмосфераси манзарасини жуда таъсирли, космос қоронғулигини эса кутилганидан ҳам чуқурроқ деб таърифлади.
Қайд этилишича, мазкур миссия миллиардер Жефф Безосга тегишли Blue Origin компаниясининг 16-пилотли парвози ҳисобланади. Сўнгги йилларда 80 га яқин бадавлат инсон қисқа муддатли космик саёҳатларда иштирок этган. Парвоз чипталари нархи эса расман ошкор қилинмаган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
