Украина президенти Володимир Зеленский яқин вақт ичида АҚШ президенти Доналд Трамп билан шахсан учрашиш режалаштирилаётганини маълум қилди. Давлат раҳбарининг сўзларига кўра, Украина Миллий хавфсизлик ва мудофаа кенгаши котиби Рустем Умеров Америка томони билан навбатдаги алоқалар натижаси юзасидан ҳисобот берган.
Зеленский ижтимоий тармоқлардаги саҳифасида «бир кунни ҳам бой бермаслик» зарурлигини таъкидлаб, яқин кунларда энг олий даражада — президент Трамп билан учрашув бўйича келишувга эришилганини ёзди. Унинг фикрича, янги йилгача кўплаб муҳим масалалар бўйича аниқ қарорлар қабул қилиниши мумкин. Учрашувнинг аниқ санаси ҳозирча очиқланмаган.
Дипломатик манбаларга таяниб ёзган Kyiv Post нашрига кўра, Зеленский Трампнинг Флоридада жойлашган Мар-а-Лаго қароргоҳига ташриф буюриши мумкин. Манбаларнинг айтишича, агар барча ташкилий масалалар мувофиқ келса, учрашув 28 декабрь куни бўлиб ўтиши эҳтимолдан холи эмас. Шу сана ва жойни Axios нашри журналисти Барак Равид ҳам тилга олган.
Эслатиб ўтиш жоизки, бир кун олдин Зеленский Трамп жамоасининг музокарачилари — Стив Уиткофф ва Жаред Кушнер билан «жуда самарали суҳбат» ўтказганини маълум қилган эди. Унинг таъкидлашича, ушбу мулоқотлар узоқ муддатли тинчликка олиб бориши мумкин бўлган қатор амалий ғояларни очиб берган.
Тўртинчи ташриф: Муносабатлар тикланадими?
Бу сафар Зеленскийнинг Трамп билан учрашиш учун АҚШга қилаётган тўртинчи ташрифи бўлади. Илк учрашув 2025 йил февраль ойида Овал кабинетда ўтказилиб, кескин баҳслар билан якунланган эди. Кейинги икки учрашув эса нисбатан тинч ва конструктив муҳитда ўтган.
Айни пайтда Зеленский–Трамп мулоқоти арафасида тинчлик режасига оид бир қатор мураккаб масалалар очиқ қолмоқда. Улар орасида энг баҳсли нуқталардан бири — Запорижжя атом электр станцияси бошқаруви ҳисобланади. Украина бу объектни АҚШ билан тенг улушда бошқаришни таклиф қилмоқда, Вашингтон эса унда Россия иштирокини ҳам назарда тутувчи вариантларни кўриб чиқмоқда.
Тинчлик режаси ва ҳудудлар масаласи
Учрашувда урушни тўхтатишнинг икки хил ёндашуви тўқнашиши мумкин:
Зеленскийнинг позицияси: Қўшинларни фронт чизиғидан олиб чиқиш ва у ерда эркин иқтисодий зона ёки демилитаризация қилинган ҳудуд яратиш.
Путиннинг талаби: «Донбасс — Россияники» тамойилидан воз кечмаслик ва муайян ҳудудларни алмашиш.
Меҳмон гуруҳидаги фойдаланувчилар ушбу мақолага изоҳ қолдира олмайди.
