Украина президенти Володимир Зеленский 29 декабр куни Флоридада АҚШ президенти Доналд Трамп билан бўлиб ўтган музокаралар якунлари бўйича батафсил баёнот берди. Давлат раҳбарига кўра, учрашув давомида Вашингтон томони Украина учун кучли ва узоқ муддатли хавфсизлик кафолатларини қўллаб-қувватлашини аниқ тасдиқлаган.
Зеленскийнинг таъкидлашича, хавфсизлик масалалари бўйича барча асосий жиҳатлар аввалдан техник ва музокара гуруҳлари томонидан ишлаб чиқилган бўлиб, Трамп уларни маъқуллаган. Шунингдек, ушбу келишувлар АҚШ Конгресси муҳокамасига киритилиши ҳам тасдиқланган. Украина раҳбари буни “жуда кучли ва тарихий аҳамиятга эга келишув” деб баҳолади.
Музокараларда урушдан кейин Украинани иқтисодий тиклаш масаласи ҳам алоҳида муҳокама қилинган. Режаларга кўра, АҚШ бизнеси учун Украинани қайта қуриш ва ривожлантиришда иштирок этишга қаратилган махсус шартлар яратилади. Шу билан бирга, икки давлат ўртасида эркин савдо тўғрисидаги келишув устида иш бошлаш масаласи ҳам кун тартибига қўйилган.
Хавфсизлик кафолатлари бўйича томонлар 15 йиллик механизмга келишиб олган. Бироқ Зеленский ушбу муддатни янада узайтириш, ҳатто 30–50 йиллик форматни ҳам кўриб чиқишни таклиф этганини айтди. Унинг фикрича, бундай қарор Доналд Трамп учун тарихий қадам бўлиши мумкин. АҚШ президенти эса бу масала устида ўйлаб кўришга тайёр эканини билдирган.
Шунингдек, музокараларда кейинги сиёсий қадамлар ҳам белгилаб олинган. Яқин кунларда АҚШ ва Европа давлатларининг миллий хавфсизлик бўйича маслаҳатчилари даражасида учрашув ўтказилиши режалаштирилмоқда. Бу учрашув Украина ҳудудида бўлиши мумкин. Барча ҳужжатлар тайёр бўлгач, Европа етакчилари аввало Украина билан кенг форматда музокара ўтказади, кейин эса Трамп иштирокидаги учрашувга тайёргарлик бошланади.
Зеленскийнинг таъкидлашича, агар жараён босқичма-босқич олға силжиса, кейинчалик Россия билан ҳам маълум форматда учрашув ўтказиш эҳтимоли бор. Украина томони бундай музокараларга тайёр эканини яна бир бор билдирган.
Украина президенти шунингдек, мамлакатда 20 банддан иборат тинчлик режасини тасдиқлаш учун референдум ўтказиш зарурлигини таъкидлади. Бироқ бундай овоз беришни ўтказиш учун камида 60 кунлик ўт очишни тўхтатиш режими талаб этилади. Зеленскийнинг айтишича, Россия айнан шу таклифга рози бўлмаяпти ва ҳарбий босимни давом эттиришни афзал кўряпти.
Украина раҳбари бу ҳолатни жуда мураккаб деб баҳолаб, мамлакат халқаро ҳамжамият билан биргаликда сулҳга эришиш учун курашни давом эттираётганини қайд этди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
