Португалиянинг Мадейра оролида жойлашган СR7 музейи олдида ғалати ва жамоатчиликни ларзага солган ҳодиса кузатилди. Номаълум шахс Криштиану Роналду ҳайкалига ўт қўйишга уринган. У воқеани видеога олиб, кейин уни ижтимоий тармоқларда ҳам кўз-кўз қилгани айтилмоқда. Бу ҳақда УОЛ нашри хабар берди.
Маълумотларга кўра, эркак видеони ўзининг Инстаграм саҳифасига жойлаштириб, изоҳ қисмида “Бу Худонинг охирги огоҳлантириши”, деб ёзган ҳамда Криштиану Роналдунинг расмий аккаунтини белгилаган. Унинг бу ёзуви ҳам, ҳаракати ҳам кўпчиликда турли саволлар уйғотди.
Видеоязувда йигит Роналду ҳайкали томонига ёнувчан суюқлик сепиб, кейин уни алангалатиб юбораётгани аниқ кўринади. Шундан сўнг у мусиқа қўйиб, рақсга тушиб кетган. Аммо ёнғин узоқ давом этмаган — аланга тез орада пасайиб, ўчиб кетган. Айтилишича, ҳайкалга жиддий зарар етмаган, катта шикаст кузатилмаган.
Эслатиб ўтамиз, мазкур ҳайкал португалиялик футболчининг туғилган юрти ҳисобланган Мадейра оролининг Фуншал шаҳрида ўрнатилган. Бу жой сайёҳлар энг кўп ташриф буюрадиган нуқталардан бири саналади. СR7 музейи олдидаги ҳайкал ҳам айнан шунинг учун доим диққат марказида бўлади. Музейнинг ўзида эса Роналду фаолияти давомида қўлга киритган ютуқлари, портретлари ва шахсий буюмлари намойиш этилади.
Португалиянинг “Коррейу да Манья” нашри хабарига кўра, Мадейра ороли Жамоат хавфсизлиги полицияси (ПСП) ҳодисани содир этган шахсни аллақачон аниқлаган. Қайд этилишича, у аввал ҳам шунга ўхшаш ишлар билан танилган.
“Zamin”ни Telegram'да ўқинг!
