Бирлашган Араб Амирликларининг Дубай шаҳрида сайёҳлар ва заргарлик соҳаси вакиллари учун тилла билан қопланган дунёдаги илк кўчани барпо этиш режаси муҳокамага чиқди. Бу ҳақда The Independent нашри хабар берди.
Маълум қилинишича, “тилла кўча” Дубайда янгидан шакллантирилиши кўзда тутилаётган заргарлик кварталининг марказий қисмига айланади. Лойиҳа маҳаллий заргарлик саноатини кучайтириш, шу билан бирга хорижий сайёҳлар ва харидорларни янада кўпроқ жалб қилишга қаратилган. Ташаббус Ithrа Dubai девлоперлик компанияси томонидан илгари сурилган бўлиб, лойиҳа тафсилотлари босқичма-босқич эълон қилиниши кутилмоқда.
Дубай фестиваллари ва чакана савдо бошқармаси бош директори Аҳмад ал-Ҳажжа мазкур режа ҳақида фикр билдирар экан, олтин Дубай маданияти ва савдосининг ажралмас бўлаги эканини таъкидлади. Унинг сўзларига кўра, янги ташаббус нафақат тарихий меросга ҳурмат, балки ижодкорлик ва барқарор ривожланишга таянган янги давр талқинини ҳам ифодалайди.
Маҳаллий нашрлар маълумотларига кўра, янги заргарлик ҳудудида 1000 дан ортиқ дўкон жойлашиши режалаштирилган. Бу ерда тилла ва заргарлик буюмлари билан бир қаторда, атир-упа ҳамда косметика маҳсулотлари ҳам сотилиши айтилмоқда. Шунингдек, ҳудудда олтита янги меҳмонхона қурилиши кўзда тутилган. Қайд этилишича, квартал Дубайнинг энг қадимий анъанавий бозорларидан бири ҳисобланган Тилла бозор яқинида жойлашади. Бироқ лойиҳа қиймати ҳозирча очиқланмаган.
Олтин Дубай учун шунчаки қимматбаҳо металл эмас, балки шаҳар иқтисодиётининг муҳим тармоғи ва ўзига хос ташриф қоғози саналади. Айтилишича, бутун дунёдаги олтин айланмасининг тахминан 20–25 фоизи айнан Дубай орқали ўтади.
Амирлик олтинни асосан хом ашё кўринишида қабул қилиб, уни қайта ишлайди ва тайёр маҳсулот сифатида экспорт қилади. Шунингдек, дунёдаги энг оғир тилла узук — “Таиба Нажмат” ҳам айнан шу ерда сақланиши қайд этилади. Унинг вазни 64 килодан ортиқ экани айтилган.
Агар лойиҳа тасдиқланса, Дубай яна бир бор “олтин пойтахти” деган номига янги рамз қўшади — туристлар учун эса бу жой, эҳтимол, энг кўп суратга олинадиган манзиллардан бирига айланади.
“Zamin”ни Telegram'да ўқинг!
