Хитой раҳбари Си Цзиньпин мамлакат қуролли кучларида коррупция ва садоқатсизликка қарши кескин кураш эълон қилди. У парламентнинг йиллик сессиясида сўзга чиқиб, армия сафида партияга содиқ бўлмаган ҳамда порахўрлик билан шуғулланадиган шахсларга ўрин йўқлигини таъкидлади. Бу баёнот Хитой Халқ озодлик армияси ва Халқ қуролли милицияси вакиллари иштирокида ўтган йиғилишда янгради.
Таҳлилчиларнинг фикрича, бу ҳаракатлар 2023 йил ўрталаридан буён давом этаётган кенг кўламли тозалаш кампаниясининг давомидир. Ўтган давр мобайнида Марказий ҳарбий кенгашнинг бир қатор юқори мартабали аъзолари, жумладан, собиқ мудофаа вазири ва ўндан ортиқ генерал ўз лавозимларидан четлаштирилди. Айниқса, Си Цзиньпиннинг яқин сафдоши ҳисобланган генерал Чжан Юсянинг терговга тортилиши сиёсий доираларда катта шов-шувга сабаб бўлди. Айрим хорижий нашрларнинг ёзишича, генерал давлат сирларини, хусусан, ядровий маълумотларни АҚШ фойдасига ошкор қилганликда гумон қилинмоқда.
Блоомберг агентлиги маълумотларига кўра, жорий йилда ўтаётган Бутунхитой халқ вакиллари йиғилишига 113 нафар делегатнинг келмагани ҳукуматдаги жиддий ўзгаришлардан далолат беради. Бу кўрсаткич сўнгги йиллардаги энг паст натижа бўлиб, фақат пандемия давридаги ҳолатдан кейинги ўринда туради. Кузатувчилар ушбу ҳолатни армия ва давлат бошқарув тизимида амалга оширилаётган тозалашлар билан боғламоқда.
“Zamin”ни Telegram'да ўқинг!
