D4vd тахаллуси билан машҳур бўлган америкалик репер Дэвид Энтони Берк 14 ёшли қизалоқнинг ўлимига алоқадорликда гумонланиб қўлга олинди. Бу ҳақда “Al Jazeera” нашри маълум қилди.
14 ёшли Селасте Риваснинг жасади ҳуқуқни муҳофаза қилувчи органлар томонидан мусодара қилинган, унга тегишли бўлган автомобил ичида аниқланган.
Хабарларга кўра, Беркнинг ҳибсга олиниши полиция Риваснинг чириган жасадини унинг номида рўйхатдан ўтган Tesla русумли машина юкхонасидан топганидан етти ой ўтиб амалга оширилган.
Тергов маълумотларига кўра, автомобил ичида икки дона қора сумка аниқланган. Уларнинг бирида чириган бош ва тана қисми, иккинчисида эса бошқа тана бўлаклари жойлашган бўлган. Лос-Анжелес округи прокуратураси душанба куни Дэвид Энтони Беркка нисбатан расмий айбловлар юзасидан ишни кўриб чиқиши кутилмоқда. Репер ҳимоячилари эса унинг айбсиз эканини қатъий равишда ҳимоя қилишларини билдирган.
Маълумот ўрнида, 21 ёшли репер Нью-Йорк штати Квинс ҳудудидан экани айтилади. У 2022 йилда “Romantic Homicide” номли таронаси TikTok ижтимоий тармоғида оммалашиб, интернетда кенг машҳурликка эришган эди. Селасте Ривас эса 2024 йилда 13 ёшида бедарак йўқолган. Кейинчалик репернинг автомобилидан топилган жасад Лос-Анжелес полиция департаменти томонидан айнан бедарак бўлган калифорниялик ўсмир Селасте Ривасга тегишли экани тасдиқланган.
“Zamin”ни Telegram'да ўқинг!
