25 апрель, шанба оқшомида АҚШдаги Hilton меҳмонхонасида содир бўлган отишма ҳолати катта шов-шувга сабаб бўлди. Ўша пайтда бинода анъанавий тарзда ўтказиладиган Оқ уй мухбирлари ассоциациясининг кечки тадбири бўлиб ўтаётган эди ва унда юқори мартабали амалдорлар ҳам иштирок этаётганди.
Дастлабки маълумотларга кўра, қуролланган шахс хавфсизлик назорати пунктини бузиб ўтиб, ходимларга қарата ўқ узган. Видеокузатув тасвирларида унинг тез ҳаракатда назорат ҳудудидан ўтиб кетгани ва бир лаҳза хавфсизлик ходимларини саросимага солгани акс этган.
ФҚБ вакилларининг билдиришича, ҳужумчи Махфий хизмат агентига ўқ узган. Бахтга қарши, офицерни ўқ ўтказмайдиган жилет ҳимоя қилган ва унинг аҳволи барқарор деб баҳоланмоқда.
Отишма овозлари янграши билан тадбир дарҳол тўхтатилди. Залдаги 2600 га яқин иштирокчи паноҳ излаб, ҳар ким ўзини хавфсиз жойга олди. Хавфсизлик кучлари юқори мартабали амалдорларни, жумладан Марко Рубио, Роберт Ф. Кеннеди ва Даг Бергумни ерга ётқизиб, ҳимояга олди.
Шу билан бирга, Дональд Трамп ва унинг рафиқаси Махфий хизмат ходимлари томонидан тезкор равишда эвакуация қилинди. Манбаларга кўра, Трамп бир муддат саҳна ортида қолган ва вазиятни назорат қилишга ҳаракат қилган.
Гумонланувчи ушланган / Фото: Reuters
Ҳужумчи тез орада қўлга олинди. Расмийлар унинг ёлғиз ҳаракат қилганини тахмин қилмоқда. Кейинчалик Дональд Трамп журналистлар олдида чиқиш қилиб, ҳужум бартараф этилганини ва барча расмийлар хавфсиз эканини маълум қилди.
«Бир киши бир нечта қурол билан қуролланган ҳолда хавфсизлик назорат пунктига бостириб кирди ва у Махфий хизматнинг баъзи жуда жасур аъзолари томонидан зарарсизлантирилди», деди Трамп ҳодисадан кейин Оқ уйда ўтказилган матбуот анжуманида.
«Биласизми, у тахминан 45 метр масофадан бостириб келди, шунинг учун у залдан жуда узоқда эди. У ҳаракатда эди. У ҳақиқатан ҳам тез ҳаракат қилаётган эди», деди Трамп тантанали кечки овқат бекор қилинганидан кейин.
Ҳозирда ҳодиса юзасидан тергов ҳаракатлари давом этмоқда. Шу билан бирга, бекор қилинган тадбирни қайта ташкил этиш режаси ҳам кўриб чиқилаётгани айтилмоқда.
Қисқача айтганда, бу воқеа хавфсизлик тизими қай даражада муҳим эканини яна бир бор кўрсатди. Бир неча сониялик ҳужум катта фожиага айланиши мумкин эди, аммо тезкор ҳаракатлар орқали вазият назоратга олинди.
“Zamin”ни Telegram'да ўқинг!
