Фронтда роботлар: Украина уруш қоидаларини кескин ўзгартирмоқда (фото)
Украина армияси фронтда шахсий таркиб йўқотишларини камайтириш мақсадида ер усти учувчисиз роботларидан кенг фойдаланишни бошлади. Хусусан, айрим бригадалар пиёда кучларининг қарийб 30 фоизини роботлаштирилган техникалар билан алмаштиришни ва шу орқали таъминот самарадорлигини оширишни режалаштирмоқда. Бундай қурилмалар хавфли нуқталарда инсон ўрнини эгаллаб, оғир юкларни ташиш ва жанговар вазифаларни бажаришда юқори натижа кўрсатмоқда. Бироқ экспертлар масофавий бошқарув тизими қурол қўллашдаги ахлоқий масъулият масаласини мураккаблаштириши мумкинлигидан хавотирдалар.
Замонавий уруш майдонида янги тенденция шаклланмоқда — инсон ўрнини технология босқичма-босқич эгалламоқда. The Independent нашри хабарига кўра, Украина армияси фронтда пиёда аскарлар ўрнига ер усти учувчисиз роботлардан кенг фойдаланишни йўлга қўймоқда.
Хусусан, 3-штурм бригадаси шахсий таркиб йўқотишларини камайтириш мақсадида пиёда кучларининг қарийб 30 фоизини роботлаштирилган транспорт воситалари билан алмаштиришни режалаштирмоқда. Бу қарор ортида жуда оддий, аммо муҳим мантиқ ётади: инсон ҳаёти хавф остида бўлган нуқталарда роботлар ишлатилиши керак.
“Аскарнинг ҳаёти беқиёс қадрга эга. Робот эса қонамайди. Бу — урушнинг янги босқичи”, — дейди ҳимоячилардан бири.
Айни пайтда бундай қурилмалар фронтдаги логистика тизимини тубдан ўзгартириб улгурган. Агар оддий пиёда аскар ўртача 20 килограмм юк кўтара олса, ер усти дронлари 200 килограммдан 600 килограммгача бўлган оғирликни олдинги чизиққа етказиб бера олади. Бу эса таъминот самарадорлигини бир неча баравар оширади.
Бироқ экспертлар бу жараённинг салбий томонларига ҳам эътибор қаратишмоқда. Хусусан, операторнинг жанг майдонидан жисмонан узоқда бўлиши қурол қўллаш масъулияти ва ахлоқий чегаралар ҳақида жиддий саволларни келтириб чиқармоқда.
Қисқача айтганда, роботлар урушни ўзгартиряпти — тез, совуқ ва ҳисоб-китоб асосида. Аммо бу ўзгариш инсон омилини қанчалик четга суриши эса ҳали очиқ савол бўлиб қолмоқда.
Изоҳлар 0
…