Эрон ташқи ишлар вазири Аббос Ароқчи 27 апрель куни Россияга расмий ташриф билан боради. Бу ҳақда Эрон элчихонаси Россияда маълум қилди.
Маълумотларга кўра, ташриф давомида Москвада юқори даражадаги учрашувлар бўлиб ўтади. Асосий эътибор Эрон ва АҚШ ўртасидаги музокаралар жараёни, ўт очишни тўхтатиш шартлари ҳамда минтақадаги вазиятга қаратилган.
Эрон томони Россия раҳбариятига ушбу музокаралар бўйича батафсил маълумот тақдим этиши кутилмоқда. Шунингдек, Владимир Путин билан ҳам учрашув режалаштирилгани айтилмоқда. Бу маълумотни Кремль матбуот котиби Дмитрий Песков ҳам тасдиқлаган.
Қизиғи, ушбу ташрифдан олдин Ароқчи Покистонга бориб, АҚШ билан эҳтимолий тинчлик музокараларини қайта бошлаш масаласини муҳокама қилди. Бироқ расмий Теҳрон ҳозирча америкалик вакиллар билан тўғридан-тўғри учрашув ўтказишни режалаштирмаётганини билдирган. Эрон ўз позициясини Покистон орқали етказишни маъқул кўрмоқда.
Айни пайтда Доналд Трамп ҳам Эрондан муайян таклифлар кутилаётганини айтди, аммо бу таклифларнинг мазмуни ҳали аниқ эмаслигини таъкидлади.
Қисқача айтганда, дипломатик ўйин қизғин фазада. Москвадаги учрашувлар нафақат Эрон-АҚШ муносабатларига, балки бутун минтақадаги сиёсий мувозанатга таъсир қилиши мумкин.
“Zamin”ни Telegram'да ўқинг!
