Фото: El Mañana de Nuevo Laredo
Мексиканинг Наярит штатида жорий йилнинг 27 апрель куни ўтказилган махсус тезкор амалиёт давомида жиноят оламида “Боғбон” (El Jardinero) номи билан танилган хавфли наркобарон Аудиас Флорес Силва қўлга олинди. Бу ҳақда мамлакат жамоат хавфсизлиги ва фуқароларни ҳимоя қилиш вазири Омар Гарсиа Харфуш расмий баёнот билан чиқди.
Маълум қилинишича, мазкур шахс халқаро миқёсда қидирувда бўлган ва уни ушлаш учун жиддий куч ва ресурслар сафарбар этилган. Айниқса, АҚШ ҳукумати томонидан унинг қўлга олинишига ёрдам берадиган маълумот учун 5 миллион доллар миқдорида мукофот эълон қилингани унинг қанчалик хавфли шахс эканини яна бир бор кўрсатади.
Аудиас Флорес Силва Мексикадаги энг йирик ва таъсирчан жиноий тузилмалардан бири — «Янги авлод Халиско»нинг етакчи аъзоларидан бири сифатида танилган. Ушбу картель мамлакатдаги наркотик савдоси ва уюшган жиноятчиликда муҳим ўрин тутади.
ОАВ маълумотларига кўра, “Боғбон” картель асосчиси Немесио Осегера Сервантес (Эл Менчо)нинг эҳтимолий вориси сифатида кўрилган. Эслатиб ўтиш жоиз, мазкур жиноят гуруҳи етакчиси шу йилнинг 22 февралида ҳарбий амалиёт давомида йўқ қилингани ҳақида хабарлар тарқалган эди.
Мутахассислар фикрича, Силванинг қўлга олиниши картель фаолиятига жиддий зарба бўлиши мумкин. Бироқ бу каби тузилмаларда етакчилар тез алмашиши ва янги кучлар пайдо бўлиши эҳтимоли ҳам юқори экани таъкидланмоқда.
Қисқаси, Мексика ҳукумати томонидан амалга оширилган ушбу операция уюшган жиноятчиликка қарши курашда муҳим қадам бўлди. Аммо кураш ҳали якунлангани йўқ — бу фақат катта ўйиннинг навбатдаги босқичи, холос.
