Ҳиндистонда содир бўлган ғайриоддий воқеа жамоатчилик эътиборини тортди. “India Today” хабарига кўра, бир эркак марҳума синглисининг ҳисобидаги маблағни олиш учун унинг скелетини банкка олиб келган.
Маълум қилинишича, Дианали қишлоғида яшовчи Житу Мунда (50) исмли эркак 2026 йил 26 январда вафот этган опаси Калра Мунданинг (56) банк ҳисоб рақамидан 20 минг рупияни (211 доллар) ечиб олмоқчи бўлган. Опаси Калра Мунда ортида расмий меросхўр қолдирмаган. Шу боис, қонуний жиҳатдан маблағлар акасига тегишли ҳисобланган.
Бироқ "Одиша Грамин" банк ходимлари ундан ўлимни тасдиқловчи ҳужжатлар — гувоҳнома ёки бошқа расмий далилларни тақдим этишни талаб қилган. Саводсизлиги сабаб эркак бу талабни тўлиқ англаб етмаган ва масалани бошқача йўл билан ҳал қилишга уринган.
Унинг айтишича, банк ходимлари “ҳисоб эгасини олиб келиш” кераклигини таъкидлашган. Эркак эса бу сўзларни сўзма-сўз тушуниб, синглисининг қабрини кавлаган ва унинг вафот этганини исботлаш мақсадида скелетини банкка олиб борган.
“Бир неча бор бордим, лекин пулни беришмади. 'Эгаси келсин', дейишди. Мен унинг ўлганини айтдим, аммо ишонишмади. Охири ноилож қабрни очиб, суякларини олиб бордим”, — дея у журналистларга изоҳ берган.
Мазкур ҳолат тез орада ҳуқуқ-тартибот органлари эътиборини тортди. Полиция вазиятни ўрганиб чиқиб, эркакка маблағни қонуний тартибда олишда ёрдам беришини маълум қилган. Шунингдек, марҳуманинг суяклари қайта дафн этилиши ҳам назоратга олинган.
Маҳаллий ҳокимият вакиллари эса банкка мурожаат қилиб, масалани тезкор ҳал этиш ва эркакка тегишли маблағни тўлаб бериш чораларини кўришни талаб қилган.
Ушбу воқеа оддий фуқаролар учун ҳуқуқий саводхонлик нақадар муҳим эканини яна бир бор эслатди.
“Zamin”ни Telegram'да ўқинг!
