22:26 / 29.04.2026

Ҳиндистонда эркак опасининг жасадини қазиб олиб, унинг ҳисобидан пул йечиш мақсадида банкка олиб борган

Ҳиндистонда эркак опасининг жасадини қазиб олиб, унинг ҳисоб рақамидан 211 доллар ечиб олиш мақсадида банкка олиб борган. Бу ҳақда New York Post хабар берди.

Воқеа акс этган видео ижтимоий тармоқларда кенг тарқалди. 50 ёшли Житу Мунда опасининг вафот этганини исботлаш орқали унинг ҳисобидаги маблағдан фойдаланмоқчи бўлган. Бироқ у банкка ўлимни тасдиқловчи зарур ҳужжатларни тақдим эта олмаган.

Маълум қилинишича, у январь ойида 56 ёшида вафот этган опаси Калра Мунданинг ҳисобидан тахминан 20 минг рупий (211 доллар) ечиб олишга ҳаракат қилган. Мунда рўмолга ўралган жасад қолдиқларини Одиша штатининг Кеонжҳар туманида жойлашган Odisha Grameen Bank филиалига олиб келган.

“Мен бир неча маротаба банкка бордим ва у ердаги ходимлар менга ҳисоб эгасини олиб келишни, шундан кейингина унинг номидаги маблағни олишим мумкинлигини айтди. Ўлганини айтган бўлсам ҳам, гапимга ишонишмади ва банкка олиб келишни талаб қилишди. Шу боис аламимдан қабрни қазиб, ўлим исботи сифатида унинг скелетини олиб чиқдим”, деди Мунда журналистларга.

Расмийлар маълумотига кўра, эркак опасининг ҳисобидаги пулни олиш учун ўзини қонуний ворис сифатида расмийлаштириш тартибини тўлиқ тушунмаган.

“Житу саводсиз қабила вакили. Банк ходимлари унга марҳум ҳисобидан пул ечиш тартибини етарлича тушунтириб бера олмаган”, деди маҳаллий полиция инспектори Киран Прасад Саҳу.

Ҳодисадан кейин расмийлар Мундага маблағни қонуний тартибда олиш жараёнини якунлашда ёрдам берган. Опасининг жасади эса полиция назорати остида қайта дафн қилинган.

Odisha Grameen Bank раиси воқеани “жуда ачинарли ҳолат” дея баҳолаб, ходимлардан тартиб-қоидаларга қатъий амал қилишни талаб қилди.

Банк вакилларининг таъкидлашича, ходимлар Мундага маблағни олиш учун ўлим ҳақидаги гувоҳнома ва мерос ҳуқуқини тасдиқловчи ҳужжатлар талаб этилишини тушунтирган. Бироқ у бу талабларга рози бўлмаган ва кейинчалик опасининг жасади билан банкка яна келган. Бу ҳолат банк ходимлари ҳамда мижозлар орасида саросима келтириб чиқарган, шундан сўнг маҳаллий полицияга хабар берилган.

“Полиция вазиятга аралашди ва масала ҳал этилди”, деди раис Риши Сингх.

Мундага ушбу воқеа бўйича ҳеч қандай айблов қўйилмагани маълум қилинмоқда.