АҚШ президенти Доналд Трампнинг ўғиллари — Эрик Трамп ва кичик Доналд Трамп Қозоғистонда вольфрам қазиб олиш билан боғлиқ йирик инвестиция лойиҳасида улушга эга бўлди. Бу ҳақда Financial Times нашри манбаларга таяниб хабар берди.
Маълумотларга кўра, ака-ука Трамп 2025 йил август ойида қурилиш соҳасида фаолият юритувчи Skyline Builders компаниясидан улуш сотиб олган. Кейинчалик амалга оширилган бир қатор битимлар орқали улар Kaz Resources компаниясининг тахминан 20 фоиз улушини қўлга киритган. Ушбу компания йирик инвестиция тузилмаси — Cove Capital билан алоқадор экани айтилмоқда.
Шундан сўнг Kaz Resources ҳамда Қозоғистондаги кон лойиҳаларини бошқарувчи Cove Kaz Capital компаниялари бирлаштирилиб, ягона корпоратив тузилма шакллантирилган. Янги ташкил этилган компания Kaz Resources бренди остида NASDAQ биржасида акцияларни оммавий жойлаштириш (IPO)ни режалаштирмоқда.
Нашр қайд этишича, ўтган йили АҚШнинг US Eksport-Import Bank ва US International Development Finance Corporation Қозоғистондаги вольфрам қазиб олиш лойиҳаларини қўллаб-қувватлаш учун 1,6 миллиард долларгача молиявий ёрдам ажратишни маъқуллаган. Лойиҳанинг асосий — 70 фоизлик назорат пакети айнан Cove Kaz Capital таркибига тегишли.
Кичик Трампнинг таъкидлашича, у ушбу лойиҳада пассив инвестор сифатида иштирок этмоқда. Яъни, у кундалик операцион фаолиятга аралашмайди ва сармоя киритилган компаниялар манфаатлари учун АҚШ ҳукумат идоралари билан бевосита алоқа ўрнатмайди.
Таҳлилчиларга кўра, бу каби йирик инвестициялар Марказий Осиёда стратегик хомашё ресурсларига бўлган глобал қизиқиш ортиб бораётганини яна бир бор тасдиқлайди.
“Zamin”ни Telegram'да ўқинг!
