АҚШ президенти Дональд Трамп Эрон томонидан илгари сурилган янги тинчлик ташаббусини қатъий рад этди. У Исроилнинг «Kan» телеканалига берган интервьюсида мазкур режани «қабул қилиб бўлмайдиган» деб баҳолади ва Вашингтон учун мақбул эмаслигини очиқ билдирди.
Маълумотларга кўра, Эрон томонидан таклиф этилган 14 бандли режа Покистон орқали АҚШга етказилган. Ҳужжатда бир қатор жиддий талаблар илгари сурилган: жумладан, Америка қўшинларини Яқин Шарқ ҳудудидан чиқариш, денгиз блокадасини бекор қилиш, иқтисодий санкцияларни олиб ташлаш, музлатилган Эрон активларини фойдаланишга рухсат бериш ва ҳатто репарациялар тўлаш каби масалалар ўрин олган.
Шунингдек, режада Ҳўрмуз бўғозидаги фаолиятни тўлиқ тиклаш, минтақадаги ҳарбий ҳаракатларни барча фронтларда тўхтатиш каби муҳим йўналишлар ҳам назарда тутилган. Манбаларнинг билдиришича, дастлаб бир ой ичида блокада ва қуролли можарони бартараф этиш бўйича музокаралар ўтказиш, кейинчалик эса ядро дастури юзасидан алоҳида келишувга эришиш таклиф қилинган.
Бироқ Дональд Трамп ушбу шартларга нисбатан кескин муносабат билдирди. Унинг таъкидлашича, Теҳрон ҳали етарлича «товон тўламаган» ва таклиф этилаётган режа Америка манфаатларига жавоб бермайди.
Қисқача айтганда, бу баёнот АҚШ ва Эрон ўртасидаги кескинлик сақланиб қолаётганини ва томонлар ўртасида келишувга эришиш ҳали ҳам мушкул эканини кўрсатмоқда.
“Zamin”ни Telegram'да ўқинг!
