Сингапур мактабларида тартиб-интизомни кучайтиришга қаратилган янги қоидалар жорий қилинди. Энди ўқувчилар орасида ҳақорат, зўравонлик ёки буллинг ҳолатларига йўл қўйган ўғил болаларга нисбатан қаттиқ чоралар, жумладан, таёқ билан жазолаш ҳам қўлланиши мумкин.
Маълум қилинишича, мазкур жазо фақат охирги чора сифатида, яъни бошқа тарбиявий усуллар самара бермаган ҳолларда жорий этилади. Янги тартибга кўра, ўқувчи уч мартагача таёқ билан урилиши мумкин. Бу жараён эса қатъий назорат остида амалга оширилади.
Жазони қўллаш учун мактаб директори розилиги талаб этилади. Уни фақат махсус ваколат берилган ўқитувчилар амалга оширади. Шу билан бирга, ўқувчининг ёши, қилган ишининг оғирлиги ва ўз хатосини англаган-англамагани ҳам ҳисобга олинади. Жазодан сўнг эса ўқувчига психологик ёрдам кўрсатилиб, унинг ҳолати кузатиб борилади.
Қайд этилишича, мазкур чоралар фақат 9 ёшдан катта бўлган ўғил болаларга нисбатан татбиқ этилади. Қиз болалар учун эса бошқа интизомий жазолар — дарсдан кейин қолдириш, вақтинча четлатиш ёки баҳолашни пасайтириш каби усуллар қўлланилади.
Халқаро ташкилотлар, жумладан, ЮНИСЕФ бу каби жисмоний жазоларга қарши эканини билдирмоқда. Уларнинг фикрича, бундай чоралар болаларнинг руҳий ва жисмоний ҳолатига салбий таъсир кўрсатиши мумкин.
Маълумот ўрнида, Сингапурда таёқ билан жазолаш амалиёти илдизи тарихга бориб тақалади ва бугунги кунгача айрим жиноятлар учун ҳам сақланиб қолган.
