Қозоғистонда ўғил болаларга қайси исмлар кўпроқ қўйилмоқда?

Қозоғистонда Муҳаммад исми энг оммабоп эркаклар исмига айланди. Бу ҳақда Биринчи Кредит Бюроси тарқатган янги статистик маълумотларда қайд этилган.

Маълум қилинишича, 2025 йил давомида мамлакатда 172,5 минг нафар ўғил бола туғилган. Энг кўп танланган исмлар қаторига Муҳаммад, Алихон, Ойсултон, Умар ва Алдияр кирган.

Шунингдек, статистикада оила қуриш ёши бўйича ҳам маълумотлар келтирилган. Унга кўра, Қозоғистонда эркаклар ўртача 27,9 ёшда, аёллар эса 25,3 ёшда турмуш қураётгани айтилмоқда.

2026 йил бошига келиб мамлакатда 10 миллион нафар эркак яшагани маълум қилинган. Бу аёлларга нисбатан тахминан 450 минг нафарга кам ҳисобланади. Мутахассислар қайд этишича, сўнгги йилларда эркаклар улуши аста-секин ошиб, аҳолининг қарийб 49 фоизига етган.

Статистикада меҳнат бозорига оид маълумотлар ҳам келтирилган. Қайд этилишича, эркаклар хавфли ва оғир меҳнат талаб қиладиган соҳаларда кўпроқ фаолият юритмоқда. Хусусан, 83 мингдан ортиқ эркак оғир жисмоний меҳнат билан шуғулланади.