АҚШ президенти Доналд Трамп Буюк Британия бош вазири Кир Стармер олиб бораётган сиёсатни кескин танқид қилди. Бу ҳақда Sky News хабар берди.
Маълум қилинишича, Трамп Хитойга парвоз қилишидан олдин Оқ уйда журналистлар билан мулоқот чоғида Британия ҳукумати қабул қилаётган қарорлар мамлакатни “боши берк кўча”га олиб кириши мумкинлигини таъкидлаган.
Унинг фикрича, Буюк Британия Шимолий денгизда жойлашган йирик нефт захираларига эга бўлишига қарамасдан, улардан тўлиқ фойдаланмаяпти. Трамп ҳукуматни энергия сиёсатини қайта кўриб чиқишга чақириб, нефт қазиб олишни кенгайтириш лозимлигини айтди.
“Британия дунёдаги энг катта нефт ресурсларидан бирига эга. Аммо улар бу имкониятдан фойдаланиш ўрнига шамол энергетикасига ортиқча эътибор қаратиб, иқтисодиётига зарар етказмоқда”, — деди у.
Шу билан бирга, Трамп миграция масаласига ҳам тўхталиб ўтди. Унинг таъкидлашича, Европа давлатлари каби Британия ҳам ноқонуний миграция оқимидан жиддий жабр кўрмоқда. Шу сабабли у ҳукуматга чегара назоратини кучайтириш ва миграция сиёсатини қатъийлаштиришни тавсия қилди.
Журналистлар томонидан бош вазирнинг эҳтимолий истеъфоси ҳақида берилган саволга жавобан Трамп бу қарорнинг Стармернинг шахсий танлови эканини айтди. Бироқ у аввалданоқ Британия раҳбарини энергетика соҳасидаги нотўғри қадамлар оқибати оғир бўлиши мумкинлиги ҳақида огоҳлантирганини қўшимча қилди.
“Zamin”ни Telegram'да ўқинг!
