АҚШ томонидан махфий ҳужжатларнинг очиқланиши натижасида 1994 йил 27 январ куни Қозоғистон осмонида номаълум учувчи жисм (НУЖ) кузатилгани ҳақидаги маълумотлар яна бир бор жамоатчилик эътиборига тушди.
Бу ҳақда АҚШ Уруш вазирлиги томонидан расмий саҳифада эълон қилинган ҳужжатларда қайд этилган. Маълумотларга кўра, Тожикистондаги АҚШ элчихонасидан Давлат котибига юборилган дипломатик телеграммада ноодатий ҳодиса тафсилотлари келтирилган.
Ҳужжатда айтилишича, Боэинг 747 самолёти экипажи ҳамда АҚШнинг бир нечта фуқаролари Қозоғистон ҳудуди устида, тахминан 41 минг фут баландликда ҳаракатланаётган номаълум объектни кузатган.
Гувоҳларнинг таърифига кўра, жисм жуда кучли ёруғлик таратган ва шарқ томондан катта тезликда яқинлашган. У ҳавода ғайриоддий маневрлар бажариб, кескин бурилишлар қилгани ҳам қайд этилган.
Шунингдек, суратларда жисмнинг 90 даражали бурилишлар амалга оширгани, айлана шаклида юқори тезликда ҳаракатлангани ва одатий аэродинамик қонунларга зид бўлган ҳаракатлар қилгани кўрсатилган.
Ҳужжатда яна таъкидланишича, кузатилган излар тахминан 100 минг фут баландликда қайд этилган бўлиб, бу оддий самолётлар учадиган чегарадан анча юқоридир.
Мутахассислар бундай маълумотларни турлича талқин қилмоқда — айримлар бу техник эксперимент бўлиши мумкин деса, бошқалар номаълум табиий ёки илмий ҳодиса эҳтимолини ҳам инкор этмайди.
“Zamin”ни Telegram'да ўқинг!
