Германия канцлери Фридрих Мерц, Франция президенти Эммануэль Макрон ва Буюк Британия бош вазири Кир Стармер Украина президенти Володимир Зеленский билан Россия-Украина урушига барҳам бериш йўлларини муҳокама қилди. 22 май куни видеоконференция шаклида ўтган мулоқотда тинчлик жараёнини фаоллаштириш, дипломатик саъй-ҳаракатларни кучайтириш ва Европанинг ушбу жараёндаги ролини ошириш масалалари асосий ўринда бўлди.
Учрашувда томонлар Украина атрофидаги вазият нафақат Киев учун, балки бутун Европа хавфсизлиги учун муҳим аҳамиятга эга эканини таъкидлади. Шу боис Европанинг етакчи давлатлари Россия агрессиясига қарши туришда Украинани ҳарбий, сиёсий ва дипломатик жиҳатдан қўллаб-қувватлашни давом эттириш зарурлигини қайд этди.
Володимир Зеленский музокаралардан сўнг Европа иттифоқчилари Украина позицияси сўнгги вақтларда ҳарбий ва сиёсий жиҳатдан анча мустаҳкамланганини тан олаётганини билдирди. Унинг фикрича, айнан кучли босим ва ягона позиция Россияни амалий дипломатияга қайтишга мажбур қилиши мумкин.
Британия бош вазири матбуот хизмати маълумотига кўра, Европа давлатлари яқин ойларда Украинани қўллаб-қувватлашни янада кучайтиришга келишиб олган. Бу ёрдам ҳарбий имкониятларни ошириш, сиёсий босимни давом эттириш ва дипломатик майдонда Украина манфаатларини ҳимоя қилишни ўз ичига олиши мумкин.
Учрашувда Россиянинг кейинги режалари масаласи ҳам муҳокама қилинди. Зеленский Россиянинг Украина, Беларусь ва Европанинг бошқа йўналишлари бўйича эҳтимолий ҳаракатлари ҳақида маълумот берганини айтди. Шу муносабат билан махсус хизматлар ўртасида ахборот алмашинувини давом эттириш режалаштирилмоқда.
Украина ташқи ишлар вазири Андрей Сибига эса Украина–АҚШ–Россия форматидаги музокаралар ўз имкониятларини деярли тугатганини таъкидлади. Унинг фикрича, Европа Иттифоқи вакилларини тинчлик музокараларига фаол жалб қилиш жараёнга янги суръат бериши мумкин. Чунки уруш оқибатлари бевосита Европа хавфсизлигига таъсир қилаётган бир пайтда, қитъа давлатлари музокаралар четида қолмаслиги керак.
Сибига, шунингдек, Владимир Путин, Володимир Зеленский ва Дональд Трамп иштирокида давлат раҳбарлари даражасида учрашув ўтказиш ғоясини ҳам илгари сурди. Бундай формат, агар амалга ошса, урушни тўхтатиш бўйича энг юқори даражадаги сиёсий музокаралардан бирига айланиши мумкин.
Қисқаси, Европа етакчилари Украинада тинчликка эришиш масаласида янада фаолроқ ҳаракат қилишга тайёрлигини билдирмоқда. Киев эса дипломатия самара бериши учун Россияга босим кучли бўлиши керак, деган позицияда. Ҳозирча йўл осон эмас, аммо муҳими — тинчлик мавзуси яна юқори сиёсий даражада муҳокама марказига чиқмоқда.
“Zamin”ни Telegram'да ўқинг!
