Мексикада ҳайдовчи девордаги чизилган туннелни ҳақиқий деб ўйлаб, машинасини бориб урди

Монтеррей шаҳрида ғайриоддий йўл-транспорт ҳодисаси содир бўлди. Аёл ҳайдовчи деворга чизилган туннел кўринишидаги мурални ҳақиқий йўл деб қабул қилиб, машинасини девор томон бошқарган.

Маълум қилинишича, мурал "Уайли И. Койот" мультфильмидаги машҳур сохта туннел саҳнаси асосида яратилган. Тасвир узоқ масофадан қараганда йўл давом этаётгандек таассурот уйғотган.

Ҳайдовчи расм эканини кеч англаган ва автомобиль деворга бориб урилган. Зарба натижасида машинага шикаст етган. Ҳодиса вақтида одамлар жароҳатлангани ҳақида хабар берилмаган.

Автомобиль ва девор тасвирланган кадрлар тармоқларда кенг муҳокама қилинмоқда. Фойдаланувчиларнинг бир қисми бу ҳолатни мультфильмдаги саҳнанинг ҳақиқий ҳаётда такрорланишига қиёслаган.