Тарвузларни «қўриқлаётган» мушукча интернет юлдузига айланди

Таиландда яшовчи Перл лақабли мушукча ўзининг ўта жиддий қараши ва бетакрор қиёфаси билан ижтимоий тармоқларнинг ҳақиқий юлдузига айланди. Унинг тарвузлар орасида гўё жуда муҳим вазифани бажараётгандек ўтирган суратлари миллионлаб фойдаланувчиларнинг эътиборини тортмоқда.

Аслида Перл ҳақиқий тарвуз етиштириладиган фермада яшайди. Ҳосил йиғиб олинган паллада у тарвузлар ёнида деярли қимирламай ўтириши билан машҳур бўлган. Унинг жиддий нигоҳи ва «ишга берилган» қиёфаси кўпчиликка завқ бағишлаган.

Ижтимоий тармоқ фойдаланувчилари Перлнинг қошлари чимирилгандек кўринадиган қатъиятли чеҳрасига ҳазиломуз муносабат билдириб, унга «Тарвузлар бўйича бош инспектор» деган норасмий унвонни беришган. Кўпчилик унинг суратларига кулгили изоҳлар қолдириб, мушукчани интернетдаги энг меҳнаткаш «ходимлардан» бири деб аташмоқда.