Японияда инсонга чўчқа буйрагини кўчиришга тайёргарлик бошланди

Японияда тиббиёт соҳасида катта аҳамиятга эга бўлиши мумкин бўлган илмий лойиҳага старт берилиши режалаштирилмоқда. Мамлакат олимлари 2028 йилдан бошлаб генетик жиҳатдан ўзгартирилган чўчқа буйракларини инсонларга кўчириб ўтказиш бўйича клиник синовларни бошлашни мақсад қилган. Бу ҳақда The Japan Times нашри хабар берди.

Маълум қилинишича, мазкур лойиҳа Мэйдзи университети негизида ташкил этилган PorMedTec биотехнологик стартапи томонидан амалга оширилмоқда. Компания бу борада АҚШнинг eGenesis биотехнологик фирмаси билан ҳамкорлик қилиб, махсус генетик модификация қилинган чўчқалардан фойдаланмоқда.

Режага кўра, чўчқалардан олинган буйраклар Саппоро шаҳридаги Хоккайдо университети шифохонаси ҳамда Канагава префектурасида жойлашган Шонан Камакура умумий шифохонасида танлаб олинган беморларга кўчириб ўтказилади. Мутахассислар ушбу клиник синовлар хавфсизлик ва самарадорлик нуқтаи назаридан синчиклаб кузатилишини таъкидламоқда.

Олимлар фикрича, ҳайвондан инсонга орган кўчириш, яъни ксенотрансплантация, донор органлар танқислиги муаммосини ҳал этишнинг энг истиқболли йўналишларидан бири ҳисобланади. Агар ушбу технология ўзини оқласа, келажакда минглаб беморларнинг ҳаётини сақлаб қолиш имконияти пайдо бўлиши мумкин.

Маълумотларга кўра, eGenesis компанияси томонидан парвариш қилинаётган чўчқаларда инсон организмининг янги органни рад этиш эҳтимолини камайтириш ҳамда ҳайвон вирусларининг инсонга юқиш хавфини пасайтириш мақсадида жами 69 та генетик ўзгариш амалга оширилган.

Ҳозирга қадар АҚШда ушбу технология асосида тўртта клиник синов ўтказилган. Айрим беморлар операциядан кейин бир неча ой давомида диализ муолажасига муҳтож бўлмагани қайд этилган. Бу эса янги технологиянинг истиқболли эканини кўрсатувчи муҳим натижалардан бири сифатида баҳоланмоқда.

Японияда айни пайтда 300 мингдан ортиқ инсон буйрак етишмовчилиги сабабли мунтазам диализ муолажасини олмоқда. Шу билан бирга, қарийб 15 минг нафар бемор буйрак трансплантациясини навбат билан кутмоқда. Шу боис олимлар мазкур технология келажакда донор органлар етишмовчилиги муаммосини қисман бартараф этишига умид билдирмоқда.

PorMedTec раҳбари ва Мэйдзи университети профессори Хироши Нағашиманинг таъкидлашича, турлараро трансплантацияни амалиётга жорий этиш бўйича илмий изланишлар изчил давом эттирилади. Унинг фикрича, ушбу йўналиш келажакда замонавий тиббиётнинг энг самарали ва муҳим технологияларидан бирига айланиши мумкин.