Россияда авиакеросин нархи тарихий рекордни янгилади
Россияда авиация ёқилғиси нархи кескин ошиб, тарихий рекорд даражага етди. 20 августдаги савдолар якунида Санкт-Петербург халқаро товар-хомашё биржасида бир тонна авиакеросин 121 864 рублдан сотилди. Бу ҳақда The Insider хабар берди.
Бу кўрсаткич аввалги рекорддан анча юқори. Ёқилғи нархининг бундай кескин ошиши Россия ички бозорида авиакеросин таклифи чекланиб бораётгани билан изоҳланмоқда.
Биржадан ташқари бозорда ҳам нархлар юқориламоқда. Мутахассислар буни авиация ёқилғисига бўлган мавсумий талабнинг ортиши, айрим нефтни қайта ишлаш заводларидаги таъмирлаш ишлари ва етказиб бериш логистикасининг мураккаблашуви билан боғламоқда.
Россия ҳукумати ички бозорда ёқилғи таъминотини барқарорлаштириш мақсадида авиакеросин экспортини вақтинча чеклаган. Тегишли тақиқ 2 июндан кучга кирган ва 30 ноябргача амал қилади.
Аввалроқ авиакеросин нархи май ойида ҳам рекорд даражага кўтарилган эди. Ўша пайтда биржа котировкалари қарийб 97 минг рублга етган. Энди эса бу кўрсаткич 120 минг рублдан ошди.
Нархларнинг ўсишига жаҳон нефт бозоридаги вазият ҳам таъсир кўрсатмоқда. Яқин Шарқдаги қуролли можаро фонида нефт нархларининг кўтарилиши Россия бозоридаги авиаёқилғи қийматига ҳам босим қилган. Бундан ташқари, Россиядаги нефтни қайта ишлаш корхоналаридаги узилишлар ва уларга берилган зарбалар ёқилғи таклифига қўшимча босим яратган.
Шу билан бирга, Россия Транспорт вазирлиги июн ойида мамлакатда авиакеросин тақчиллиги мавжуд эмаслигини билдирган эди. Бироқ биржадаги янги рекорд нархлар ички авиация бозори учун ёқилғи масаласи долзарблигича қолаётганини кўрсатмоқда.
Изоҳлар 0
…