Шакира 200 минг песолик купюрада? Тармоқларда кутилмаган таклиф

Колумбияда Шакиранинг сурати туширилган 200 минг песолик банкнота тасвири ижтимоий тармоқларда тарқалиб, мухлислар орасида қизғин муҳокамага сабаб бўлди. Бироқ бу янги пул бирлиги эмас — ҳозирча у фақат интернетда илгари сурилаётган рамзий таклиф.

Шакиранинг Чокога ташрифи ва зилзиладан зарар кўрган ҳудудлардаги таълим муассасаларини тиклашга ёрдам бериши ортидан хонандага бўлган эътибор янада кучайди. У ўз жамғармаси орқали 10 та мактабни қайта тиклашга ёрдам беришини маълум қилган.

Шундан сўнг ижтимоий тармоқларда айрим фойдаланувчилар уни Колумбиянинг янги, фаразий 200 минг песолик банкнотасига жойлаштириш ғоясини илгари сурди. Тарқалган сурат расмий банкнота эмас, балки ижтимоий тармоқларда пайдо бўлган рақамли дизайн. Колумбия Марказий банки бундай янги купюра чиқарилганини эълон қилмаган.

Ижтимоий тармоқларда хонандани бошқа усулларда ҳам тақдирлаш ҳақидаги ғоялар пайдо бўлмоқда. Айрим фойдаланувчилар уни президентликка номзод сифатида тилга олган бўлса, бошқалар эса унинг ижтимоий фаолиятини алоҳида эътироф этишни таклиф қилмоқда.