«Ўргимчак одам» Миннеаполисдаги митингни жанжалга айлантирди

АҚШнинг Миннеаполис шаҳрида 22 август куни ўнг қанот фаоли ва мусулмонларга қарши чиқишлари билан танилган Жейк Ланг иштирокидаги митинг вақтида ғайриоддий воқеа содир бўлди. Ўргимчак одам либосидаги номаълум шахс Ланг турган пикап машинаси орқасига чиқиб, унга бир неча марта зарба берган. Унинг шахси ҳозирча аниқланмаган.

Воқеа Ланг ва унинг олти нафар тарафдори икки машинада шаҳар ҳокимияти биноси олдига келганидан кейин юз берган. Миннеаполис полицияси маълум қилишича, ҳар икки машина одамлар тўпланган ҳудуд томон тротуардан ҳаракатланган. Шундан сўнг Ланг тарафдорлари ва унга қарши намойишчилар ўртасида кескин тўқнашув бошланган.

Тўқнашувлар давомида полиция аралашган. Ҳодиса ортидан Ланг ва унинг олти нафар ҳамроҳи, шунингдек, яна бир неча намойишчи ҳибсга олинган. Полиция ходимларидан уч нафари ҳам воқеа вақтида енгил жароҳат олган.

Жейк Ланг аввал ҳам Миннеаполисда мусулмонларга қарши намойиш ўтказган. Унинг чиқишлари жамоатчиликда кескин танқидларга сабаб бўлиб келмоқда. 22 августдаги тадбир эса кўп сонли қарши намойишчилар иштирокида яна жанжал билан якунланган.