00:20 / 12.02.2018

АҚШ Хитойнинг Американи мағлуб этиш режасини фош қилди

Хитойлик ҳарбийлар 2500 йил аввал буюк саркарда Сунь Цзи томонидан баён қилинган ҳарбий стратегияни ўзлаштиришмоқда. Бу стратегия негизида “урушни жангда иштирок этмасдан ютиш” тамойили ётади. Бу ҳақда RAND Corporation тадқиқотига иқтибос келтирган ҳолда АҚШнинг National Interest нашри хабар берганлигини Кун нашри маълум қилмоқда.

Тадқиқот муаллифларининг ёзишича, Хитой АҚШ билан тўқнаш келадиган бўлса, унинг қуруқликда ҳам, ҳаво ва денгизда ҳам юқори аниқликдаги қуролини ишлата олмаслиги учун барча ишни амалга оширади.

Хитой қуролли кучлари ҳарбийлари асосий урғуни АҚШнинг маълумотларни қайта ишлаш ва қўмондонликнинг буйруқларини узатиш тизимларини ишдан чиқаришга қаратадилар. Бунинг оқибатида авиация, армия ва флот ҳаракатлари бетартиб бўлади ва муваффақиятга олиб келмайди. Хитой армияси ахборий таъсир усуллари қўллаш билан рақибни жанг майдонидан “сиқиб чиқариши” мумкин.

Муаллифларнинг фикрича, бундай тактикани америкаликлар 1991 йилда Ироққа қарши “Чўлдаги бўрон” амалиёти вақтида қўллашган. Энди эса бу усулни Хитой армияси ўзлаштириб олган.

АҚШнинг фикрича, Хитойнинг амалдаги ташқи сиёсатини тинчликпарвар деб атаб бўлмайди, у янги усуллар билан глобал етакчиликка эришишга қаратилган.

Январь охирида Хитойда янги қурол турларини яратиш учун сунъий онг ва квант технологиялари соҳасида фаолият юритувчи 120 олим танлаб олинган. Шу тариқа Хитой армияси тез орада АҚШдан ҳарбий устунлкикка эришмоқчи.