Китлар "янги ов усули"ни ўзлаштирмоқда (фото, видео)

  • 28 ноябрь 2018, 13:43
  • 2 004
  • Дунё
  • Китлар "янги ов усули"ни ўзлаштирмоқда (фото, видео)
    14 метр узунликка ва 30 тонна оғирликка етадиган букри китлар катта оғзи билан балиқлар ва планктонлар тўдаларини тутиб, сўнгра оғизларига тушган сувни юқори жағда тишлар ўрнига ўсувчи, зич жойлашган мугуз пластиналар орқали ўтказиб, ўлжани сузиб олади.

    Китларда бир неча ов қилиш техникаси мавжуд. Мисол учун, ўлжани пуфакчали тўрга ҳайдаш усули: бунда кит балиқлар тўдаси остига шўнғиб, ҳаво чиқариб спирал бўйича юқорига кўтарила бошлайди. Балиқлар пуфакчалардан иборат девор билан қуршалиб, сув сиртида ғуж бўлиб олади ва енгил ўлжага айланади.

    Фото: National Geographic
    Биологлар бир неча йил аввал букри китларда яна бир ов қилиш усулини пайқашганди. Бунда китлар балиқлар тўдасини аниқлаб, сиртга кўтарилиб, оҳиста оғизларини очади. Бунда балиқлар кит оғзига ўзлари кириб кетишади (эҳтимол, балиқлар кит оғзини ҳавода айланиб юрувчи қушлардан панагоҳ деб қабул қилишган).

    Агар балиқлар ноодатий панагоҳдан фойдаланишга шошмасалар, китлар уларни сузгичлари билан оғзига йўналтиришлари мумкин бўлган.

    2011 йилда биологлар Ванкувер яқинида иккита кит ушбу ов усулидан фойдаланаётганини пайқашган. 4 йил ўтиб 16 кит, ҳозирда эса 20 кит балиқни шундай усулда овлаётгани қайд қилинган.
    [media=https://www.youtube.com/embed/I-9NGcy1tdM]
    Кўринишича, ушбу тактика китлар орасида оммалашмоқда. Бу эса букри китлар бир-бирларидан ўрганишларидан дарак бериши мумкин. Шунингдек, китларнинг океандаги ўзгараётган шароитлар, мисол учун ем миқдорига мослашаётганларини намойиш қилади.

    » » Китлар "янги ов усули"ни ўзлаштирмоқда (фото, видео)