1 доллар маош олувчи президент. Трамп ниманинг ҳисобига кун кечиради?

АҚШ президенти Дональд Трамп президентлик лавозимида жуда кўп пул йўқотгани ҳақида айтди. Бу гап кутилганидек шов-шувларга сабаб бўлди. Бироқ президентнинг бу гапи у давлат раҳбари бўлгач ўз бизнесини ташлаб қўйганидан афсусланаётганини билдирмайди.

«Менга 1$ маош ҳам бўлаверади»
Трамп АҚШ президентлигига киришгач, ундан маоши ҳақида сўрашди ва сиёсатчи шундай жавоб берди: «Мен сайловолди чиқишларимда айтганимдек, президентлик лавозимида маош олмайман. Қонунан менга нимадир тўлашлари керак ва мен йилига 1 доллар кифоя қилади деб ўйлайман». Ҳа, ҳар қанча ғалати кўринмасин, йиллик ялпи ишки маҳсулот ҳажми 19 триллион доллардан кўп бўлган мамлакат раҳбари бир йилда 1 доллар маош олади.

Бу бизнинг пулга «чақсак», тахминан 8 500 сўм дегани. Бу пулни 12 ойга тақсимласак, АҚШ тарихидаги энг ғалати президент бўлган Дональд Трамп 700 сўм атрофида ойликка «тирикчилик қилади». Чиндан ҳам ғалати, тўғрими? Бироқ АҚШда мамлакат тарихига ўз номини қолдириш ҳар қандай миқдордаги пулдан афзал эканини инобатга олсак, аслида ҳаммаси тушунарли. Трампнинг таъбири билан айтганда, 70 ёшдан ошган бир вақтда унга шу вақтгача топганлари ҳам етиб-ортади.

515 та актив ва 3,1 миллиард доллар бойлик
Дональд Трамп нима учун мамлакат президентлигида маошдан воз кечгани тушунарли ҳолат. Чунки бугунги кунда унинг бойлиги 3,1 миллиард долларга баҳоланади. Бу пул билан Трамп дунё бойлари юзлигига кира олмаслиги мумкин, лекин умрининг қолган қисмини бемалол фаровонликда ўтказа олади. Трампнинг номига 515та актив расмийлаштирилгани маълум. Қизиғи, улардан 264тасида бевосита Трамп сўзини учратасиз: «The Trump Organization», «Trump Tower», «Trump Ice», «Trump Carousel», «Trump Classic Cars» ва ҳоказо. Унинг асосий бизнеси қурилиш ҳисобланади. Яъни, «The Trump Organization». Бу корхона асосан уй, меҳмонхона, гольф-клуб, казино қуриш билан шуғулланади. Трампнинг асосий бизнеси ҳисобланган «The Trump Organization»га 1923 йилда бўлажак президентнинг бувиси Элизабет ҳамда отаси Фред асос солишган. Кўриб турганингиздек, Трамп янги бойлардан эмас ва унинг 1 доллар маошга ишлаётганидан ажабланмаса ҳам бўлади.

Трамп 2017 йилгача, яъни АҚШ президентлигига киришгунига қадар барча корхоналарининг раҳбари ҳисобланган. Президентлик курсисида туриб бизнесни бошқариш мумкин бўлмагани сабаб раҳбарликни фарзандлари кичик Дональд, Иванка ва Эрикка қолдиради. Трампнинг деярли барча корхоналари унга тегишли «Trump Tower» биносида жойлашган. «Forbes» бу бинони 318 миллион долларга баҳолаган ва у АҚШдаги энг қиммат бинолардан бири ҳисобланади. Трамп 2015 йил президентлик сайловларида қатнашишини айнан мана шу жонажон биносида маълум қилганди.

Трамп парфюмерия бизнесида ҳам ўз ўрнига эга. «Empire» ҳамда «Success» атирлари айнан Трампнинг корхоналарида ишлаб чиқарилади. Унга шуҳрат олиб келган тармоқлардан бири эса шубҳасиз, «Trump Models» ҳисобланади. Дунёга машҳур «Коинот гўзали» танлови 1996-2015 йилларда айнан Трампнинг муассислигида ўтган.

Дарвоқе, «Коинот гўзали» танловининг 2013 йилги финали Москвада ўтказилганди. Ўшанда Путин Трамп билан учрашгани ҳақида гаплар пайдо бўлган, лекин ҳар икки томон буни рад этганди. ФҚБ собиқ раҳбари Жеймс Коми ўша тадбир ҳақида эслар экан Трампнинг Москвада енгилтак аёллар билан учрашганига ишора қилади. Владимир Путин иштирокидаги матбуот анжуманларидан бирида Россия етакчисидан шу ҳақда сўрашганда, жаноб Путин сўзамоллик билан бу саволга ҳазиломуз жавоб берганди: «Сизнингча, Трамп Москвага келиши билан бошқа иши йўқдек москвалик ижтимоий масъулиятсиз (Путин енгилтак аёлларни шундай атаганди) аёлларга «ташланганми»? Кечирасиз, биринчидан, у кап-катта одам. Иккинчидан, бу инсон (яъни Трамп) бутун умр десам, бўрттириш бўлар, узоқ вақт давомида гўзаллик конкурсларини ташкиллаштириш билан шуғулланган. Турган гапки, у дунёнинг энг чиройли аёллари билан учрашади. Шундай инсон ижтимоий масъулиятсиз енгилтак аёллар билан учрашишига ишонмаган бўлардим».

Президентликнинг илк йилида 600 миллион доллар зарар
Дональд Трамп президентлик лавозимига киришгач «Forbes»нинг АҚШ бойлари рейтингида 92 поғонага пастлади. 2017 йил октябрда журнал янги рейтингни эълон қилганди ва унда Трамп бир йил ичида 600 миллион доллар йўқотгани айтилган. Ўша вақтда миллиардернинг бойлиги 3,1 миллиард доллар деб эълон қилинганди. 2016 йилда АҚШ бойлари рейтингида 156-ўринда бўлган Трамп бир йил ўтиб 248-ўринга тушиб кетган. Бунга сабаб сифатида кўчмас мулк нархларининг тушиши ва Трампнинг президентлик сайловларида кўп харажат қилгани кўрсатилганди.

Дунё раҳбарлари қанча пул олишади?
Келинг, дунё раҳбарлари қанча маош олишлари ҳақида икки оғиз. Дональд Трамп АҚШ президенти бўлгач, у учун йиллик 400 минг доллар маош тайинланганди. Қўшимчаси Оқ уй раҳбарининг шахсий харажатлари учун АҚШ йилига 50 минг доллар, сафар харажатлари учун 100 минг доллар, дам олиши учун эса йилига 19 минг доллар ажратади. Трамп буларнинг барчасидан воз кечиб 1 доллар кифоя қилишини айтган. Баъзи манбалар президент учун ажратилган пуллар хайрия учун ишлатилишини ёзишганди.

АҚШнинг олдинги президенти Барак Обама йилига айнан 400 минг доллар маош оларди. Унга президентликдан кетганидан сўнг йиллик 200 минг доллар президентлик нафақаси ҳам тўлаб борилади. «The Economist»нинг ёзишича, АҚШ президенлари орасида энг кўп маошни Жорж Вашингтон олган. Унга йилига 25 минг доллар тўлашган. «1789 йилда бу жуда катта пул эди»,- деб ёзади журнал.

Ҳозирги сиёсатчилар орасида энг кўп маош оладигани Сингапур бош вазири Ли Сянь Лун ҳисобланади. Унинг йиллик маоши миқдори 1,76 миллион доллардир. Фуқароларнинг норозилиги сабаб унинг маоши 2,2 миллион доллардан 1,76 миллион долларга туширилган. Асвтралия бош вазири Малкольм Тернбулл 396 минг доллар, Канада бош вазири Жастин Трюдо 253 минг доллар, Германия канцлери Ангела Меркель 244 минг доллар олиши маълум. Россия Президенти Владимир Путиннинг 2017 йилдаги даромади 153 минг доллар бўлгани айтилганди. Бироқ Путиннинг 2017 йилги даромади ўзига тегишли уйни сотгани учун шунча катта бўлган. 2013 йилда Путиннинг ойлик маоши 10 минг доллар экани айтилганди.

Манба: Kun.uz «Замин»ни Telegram’да ўқинг!