Трамп Лондонга учиб келди ва қиролича билан учрашди

АҚШ президенти Дональд Трамп давлат ташрифи билан Буюк Британияга келди. У уч кунлик ташрифини қиролича Елизавета II билан учрашувдан бошлади.

АҚШ президенти самолёти маҳаллий вақт билан 3 июнь куни соат 9:00да (Тошкент вақти билан соат 13:00) Лондондаги Станстед аэропортига қўнди. У қиролича билан учрашиш учун аэропортдан вертолёт орқали Букингҳем саройига йўл олди.

Қиролича Трампни салютлар билан қарши олди.


Трамп ва унинг рафиқаси Меланияни Букингҳем саройида қиролича Елизавета II, валиаҳд Чарльз ҳамда унинг рафиқаси Камилла кутиб олишди. 3 июнь куни АҚШ президенти шарафига Елизавета II ва бош вазир Тереза Мэй иштирокида шоҳона зиёфат уюштирилади. Ташрифнинг иккинчи кунида Трамп ва Мэй ўртасида музокаралар ўтказилиши режалаштирилади, учинчи кунда эса АҚШ президенти Портсмутга бориб, иттифоқчиларнинг Нормандияга туширилишининг 75 йиллиги маросимларида иштирок этади.

^{Simon Dawson / Reuters / Scanpix / LETA}
Трампнинг бирлашган қиролликка ташрифи 5 июнгача давом этади. Уни Лондонда қироллик хонадони аъзоларидан ташқари лавозимини тарк этаётган бош вазир Тереза Мэйдан ташқари минглаб намойишчилар ҳам кутиб олишди.

Ўтган йилнинг июлида ҳам Трамп Британияга келган, аммо ўша ташриф бутунлай бошқа даражада кечганди. Ўшанда жуда кўплаб британияликлар, шу жумладан нуфузли сиёсатчилар Трамп Британияга келишига буткул қарши бўлишганди.

Ўшанда Умум палата спикери Жон Беркоу АҚШ президентига парламентда чиқиш қилишига рухсат бермаган ва ташриф мақоми давлат ташрифидан ишчи ташрифи мақомига туширилганди. Трампнинг ўзи эса Лондоннинг минглаб намойишчилар тўпланган марказий кўчаларини айланиб ўтишга мажбур бўлганди.

Ташрифнинг иккинчи кунида, 4 июнь куни режага кўра Дональд Трамп Даунинг-Стритда лавозимини тарк этаётган бош вазир Тереза Мэй билан учрашув ўтказади. 5 июнь куни эса улар биргаликда Англиянинг жанубий соҳилларига, Портсмутга йўл олишади. Бу ерга шу куни Франция президенти Эммануэль Макрон, Германия бош канцлери Ангела Меркель ва бошқа йирик сиёсатчилар, Иккинчи жаҳон урушининг 300 нафар фахрийси иттифоқчиларнинг Нормандиядаги ғалабасининг 75 йиллигига бағишлаб ўтказиладиган маросимда иштирок этиш учун йиғилади.

Ўтган йили Трампнинг ташрифига қарши намойишларга ўн минглаб киши чиққанди. Бу сафар ҳам ташкилотчилар одамларни 4 июнь куни Трафалгар майдонига йиғилишга чақиришмоқда.

Трамп 4 июнь куни Британия бош вазири қароргоҳига, Трафалгар майдонидан бир неча юз метр масофадаги Даунинг-Стритга келади.

Нафақат Лондонда, балки бутун мамлакат бўйлаб Трампга қарши кайфиятдагилар сони юқорилигича сақланиб қолмоқда - сўровларга кўра аҳолининг 46 фоизи Трамп Британияга келишига қарши, 40 фоизи қарши эмас.

Бир йил муқаддам Трамп Лондондан онасининг юрти - Шотландияга учганди. Бу сафар у Шотландияда бўлолмайди - 6 июнь куни уни Нормандияда кутишади. “Замин” янгиликларини “Twitter”да кузатиб боринг