«Унинг ўзи айбдор»: Отунбаева Атамбоевнинг ҳибсга олинишини изоҳлади

  • 10 август 2019, 18:23
  • 2 372
  • Дунё
  • «Унинг ўзи айбдор»: Отунбаева Атамбоевнинг ҳибсга олинишини изоҳлади
    Қирғизистоннинг собиқ муваққат президенти Роза Отунбаева ўзининг собиқ сафдоши Алмазбек Атамбоевнинг қўлга олиниши ҳақидаги вазият юзасидан «Настоящее Время» журналистларига изоҳ берди.

    «У уч марта Батукаев иши бўйича чақирув қоғози олган. Бу шов-шувли иш, у гувоҳлик бериши керак эди. Бу иш бўйича одамлар қамоқда ўтирибди, собиқ бош прокурор тергов изоляторида сақланмоқда», - деди Отунбаева.

    Унинг фикрича, Атамбоев тўқнашувлар ва тартибсизликлар учун биринчи навбатда айбдор. Шунингдек, жиноят оламида нуфузли шахс бўлган Азиз Батукаевнинг ноқонуний озод этилиши бўйича ишдан ташқари, яна «беш-олти ёки еттита шундай иш» собиқ президентнинг гарданида.

    У Атамбоевга берилаётган саволларни «асосли», деб ҳисоблади. Отунбаева Атамбоевни «ашаддий ўйинчи» ва жуда жиддий жиноятларга боғлиқ шахс деб атаб, «у кўп нарсага қодир» эканини билдирди.

    Отунбаеванинг эслатишича, Атамбоев Ички ишлар вазирлигига Батукаев иши бўйича чақириқ қоғозини уч марта эътиборсиз қолдирди - шунинг учун собиқ давлат раҳбарининг уйига махсус кучлар юборилди.

    Махсус кучлар ва Атамбоев тарафдорлари ўртасидаги тўқнашувдан кейин Миллий хавфсизлик давлат қўмитаси Махсус кучлар хизмати бошлиғи ўринбосари Усенбек Ниязбеков ҳалок бўлди. Бундан ташқари, 52 киши жароҳат олди, улардан 20 нафари ҳануз касалхоналарда.

    Отунбаева ва Атамбоев Қирғизистоннинг иккинчи президенти Қурманбек Бакиев даврида яқин сафдошлар ҳамда мухолифатчилар бўлган. Давлат тўнтариши ва Бакиевнинг мамлакатдан қочиб чиқиб кетиши ортидан Отунбаева муваққат президентга айланди - бу бир йил давом этди. Кейин Алмазбек Атамбоев президентликка сайланди.

    2016 йилда Атамбоев конституциявий ислоҳотлар ўтказишга қарор қилди, Отунбаева эса унинг ташаббусини танқид қилиб чиқди. Собиқ сафдошларнинг муносабатлари ёмонлашди.

    Бундан олдин, Атамбоевнинг қизи видеомурожаат билан чиққанди.

    » » «Унинг ўзи айбдор»: Отунбаева Атамбоевнинг ҳибсга олинишини изоҳлади