Импичментдан қутулган Трамп «тозалаш» бошлади. Навбатда кимлар?

Давомли твитларида Трамп Украина бўйича етакчи мутахассис, Вакиллар Палатасидаги импичмент эшитувлари марказида турган подполковник Александр Виндманни телефон мулоқоти тўғрисида «хато маълумот» етказгани ҳақида ёзган.

Якунланган ҳафтада АҚШ тарихида учинчи марта мамлакатнинг амалдаги президентини импичмент орқали лавозимидан четлатишга уриниш муваффақиятсиз якунланди. Энди Трамп Оқ уй маъмуриятидаги кадрларни қайта кўриб чиқишга киришди.

Жума куни АҚШнинг Евроиттифоқдаги элчиси Гордон Сондланд президент уни Брюсселдан чақириб олаётганини маълум қилганди.
Ундан бир неча соат аввалроқ эса Оқ уй хавфсизлик хизмати бинодан подполковник Александр Виндманни чиқариб юборди.

Унинг эгизаги, шу вақтгача Миллий хавфсизлик кенгаши қошида катта юрист сифатида ишлаб келган Евгений Виндман ҳам ишини йўқотди: уни ортга, АҚШ армия вазирлигидаги ишига қайтаришди.
Трамп расмий баёнотида подполковник Виндман тўғрисида салбий муносабат билдирган ва Америка телеканаллари фаолиятини танқид қилган.

«Мен уни умуман танимаганман ва ҳеч қачон (билишимча!) учрашмаганман, аммо у телефон мулоқотларим ҳақида маълумотни нотўғри етказиб, итоатсизлик қилди. Бошлиғи у ҳақида мутлақо ёмон тавсифнома берди, Виндманда вазиятни баҳолаш, буйруқларга бўйсуниш ва маълумотларни сир сақлаш бўйича муаммолар бор экан. Бошқача айтганда - «Йўқол», - дея ёзган Трамп.

Виндман нега керак бўлмай қолди?

^{Подполковник Виндман конгрессда ўз кўрсатмаси оқибатларидан қўрқмаслигини билдирганди GETTY IMAGES}
Ўтган йилнинг ноябрида подполковник Виндман конгрессда кўрсатма берганди. Ўшанда у Трамп ва Украина президенти Владимир Зеленский ўртасида 2019 йилнинг 25 июлида бўлиб ўтган телефон суҳбати таркибидан ташвишда эканини билдирганди.

Унинг кўрсатмалари асосида ва бошқа далилларга таянган ҳолда Вакиллар палатаси аъзолари президентга қарши ваколатини суиистеъмол қилганлик ва Конгресс фаолиятига халал бериш бўйича расмий айбловлар эълон қилганди.
Ўшанда бундай кўрсатмалар беришдан қўрқмаслиги бўйича саволга Виндман шундай деганди: «Чунки бу Америка... бу ерда, қонун устувор».

Подполковник Виндманнинг адвокати Дэвид Прессман шундай деган: «Ҳар бир америкалик у нима учун лавозимини йўқотгани ва Оқ уйда ҳарбийлар сони биттага камайгани сабаби нима эканини билади».
«Ер юзидаги энг қудратли инсон подполковникдан қасос олди», - дейилади адвокат баёнотида.

Жума куни АҚШ мудофа вазири Марк Эспер унинг департаменти аввалги лавозимидан қайтган барча ходимларини хурсандчилик билан қарши олиши ва уларни таъқиблардан ҳимоя қилишини маълум қилганди.
Пайшанба куни Трамп Оқ уйдаги душманлари ҳақида гапириб, ака-ука Виндманларни эслаб ўтганди.

Александр Виндман Оқ уйда Украина масаласи бўйича бош эксперт эди. У 1975 йилда Киевда туғилган. 1979 йилда рафиқаси вафотидан кейин унинг отаси Семён фарзандларини олиб АҚШга кўчиб ўтган. СССРни у билан уч ўғли - Леонид ҳамда эгизаклар Александр ва Евгений тарк этганди.

Сондланд Трампга нега керак бўлмай қолди?

^{Сондланд президент Трамп Украинадан сиёсий манфаат кўзлаганини айтганди}
Конгрессдаги кўрсатмалари давомида Гордон Сондланд Украина президенти Владимир Зеленскийнинг Оқ уйга ташрифи украин ҳукумати Трампнинг бўлажак сайловлардаги асосий рақиби Жо Байденнинг ўғли Ҳантер Байденга қарши текширув бошланишига боғлиқ бўлиши ҳақида гапирганди.

У Украинага Трамп учун сиёсий фойда олиб келадиган қарор қабул қилиши бўйича босим бўлганини тасдиқлаганди.
Ўша вақтда Сондланд Украина масаласида президентдан тўғридан-тўғри ёки унинг шахсий адвокати Руди Жулиани орқали кўрсатма олиб ишлаган.

«Мен президент Трампга мамлакатга хизмат қилиш имкониятини тақдим этгани учун миннатдорчилик билдираман, Давлат котиби Майкл Помпеодан ҳам мени қўллаб-қувватлагани учун миннатдорман, шунингдек, Американинг Европа Иттифоқидаги миссиясида ишловчи ҳар бир одамга раҳмат айтаман. Мен ютуқларимиз билан фахрланаман. Бу ерда олиб борган ишларимиз фаолиятимдаги энг яхши даврлар бўлди», - деган Сондланд.
Ҳозирча Сондланд дипломатик хизматда қолиши ёки бизнес соҳасига қайтиши бўйича маълумот йўқ.

Навбатдагиси ким?

^{Трамп Мик Малвейнининг изоҳидан кейин ғазаб отига минганди}
Жума куни журналистлар билан гаплашган Трамп президент маъмурияти бошлиғи Мик Малвейнининг ишдан бўшагани ҳақидаги хабарларни тасдиқламади. «Муносабатларимиз жуда яхши», - деди президент.

Унинг истеъфоси тўғрисидаги миш-мишлар ўтган йили Оқ уйда бўлиб ўтган матбуот анжуманидан кейин тарқалганди. Ўшанда Трампнинг Украина билан келишуви тўғрисидаги саволга Малвейни шундай жавоб қайтариб юборганди: «Биз ҳамиша шундай қиламиз». Ўшанда Трамп бундай қалтис хатодан қаттиқ ғазабланганди.

Кейинроқ Малвейни ўз изоҳига раддия берган, бу гапи Украинага ҳарбий ёрдам тўхтатилиши ва 2016 йилги сайловлар билан боғлиқ текширувларга алоқадор эмаслигини билдирганди.

Лекин Вашингтонда айримлар Малвейнининг ўрнини шимолий каролиналик конгрессмен, Трампнинг яқин сафдоши, жума куни президент билан унинг Air Force One самолётида учган Марк Мэдоуз эгаллашини кутишмоқда.

Сўнгги номзод

^{Жо Уолш Республикачилар партияси культга айланганини айтди Фото: EPA}
Шу кунларда иллинойслик собиқ конгрессмен, 2020 йил ноябрида ўтказиладиган сайловларда Трампнинг Республикачилар партияси ичидаги асосий рақиби бўлиши кутилган Жо Уолш ўз сайловолди кампаниясини якунлагани ҳақида эълон қилди.

Айовадаги кокусда атиги 1 фоиз овоз олган Уолш Си-эн-эн мухбирига берган интервьюсида Республикачилар партиясидаги вазият ҳақида гапирди. «Мен Трампни тўхтатишни истардим. Мен у - мамлакат учун таҳдид деб биламан. Аммо Республикачилар партиясидаги ҳеч ким уни тўхтата олмайди. Уни енгиш иложсиз».

Шу тариқа, Массачусетснинг собиқ губернатори Билл Уэлд 2020 йилги сайловлар арафасида Трампга қаршилик қиладиган ягона республикачи бўлиб қолмоқда. «Замин»ни Telegram’да ўқинг!