АҚШ элчихонаси: «Туркманистон мамлакатда коронавирус аниқланганида ҳам уни тан олмаслиги мумкин»

^{Фото: «Varlamov.ru»}
Туркманистон айни вақтга қадар мамлакатда COVID-19 касаллиги бўйича бирорта ҳолат қайд этилганини расман тан олмади ва касаллик аниқланган ҳолатда ҳам буни тасдиқламаслиги мумкин. Бу ҳақда АҚШнинг Туркманистондаги элчихонаси 16 апрель куни маълум қилган.
Таъкидланишича, мамлакатнинг турли нуқталарида, хусусан, айрим дўконларда аҳолининг тана ҳарорати ўлчанмоқда.

Дипломатик миссиянинг қайд этишича, Туркманистондаги тиббиёт протоколлари Америка стандартларига жавоб бермайди ва айрим шахслардан COVID-19’га алоқаси йўқ тиббий кўрикдан ўтиш ёки қон топшириш талаб қилинмоқда. Шу сабабли АҚШ элчихонаси ўз фуқароларига инвазив бўлмаган тиббий текширувлар ёки ҳароратни ўлчашдан ташқари ҳар қандай қолоқ тиббий муолажалардан бош тортишни тавсия қилади.

Аввалроқ Туркманистоннинг Туркманобод шаҳридаги карантин зонасида COVID-19 коронавирус инфекцияси билан касалланган етти киши сақланаётгани тўғрисида хабар берилганди. Таъкидланишича, беморларни даволашда H1N1 чўчқа гриппи вакцинасидан, шунингдек, кислород ёстиқчаларидан фойдаланилмоқда.

Март ойининг охирларида Лебоб вилоятидаги амалдорлар янги турдаги COVID-19 коронавирусидан ҳимояланиш мақсадида ўз оилаларини Репетек қўриқхонасига жойлаштиргани маълум бўлганди. Апрель ойининг бошларида эса Туркманистондаги карантин зонасидан 15 киши қочиб кетгани ҳақида хабарлар тарқалган эди. «Замин»ни Telegram’да ўқинг!