19:00 / 14.07.2020
2 113

Озарбайжоннинг икки нафар юқори мартали зобити ўлдирилди

Озарбайжоннинг икки нафар юқори мартали зобити ўлдирилди
Озарбайжон Мудофаа вазирининг ўринбосари Карим Валиев Арманистон билан чегарада отишма натижасида икки нафар юқори мартабали ҳарбийларнинг ҳалок бўлганини маълум қилди. Бу ҳақда РБК нашри хабар бермоқда.

"Бугун эрталаб генерал-маёр Полад Гашимов ва полковник Илгар Мирзаев жанг пайтида қаҳрамонларча ҳалок бўлишди", - деди Валиев.

Чегарада ҳарбий ҳаракатлар давом этмоқда. "Афсуски, уруш қурбонсиз бўлмайди. Мудофаа вазирлиги раҳбарияти номидан ҳарбий хизматчиларнинг ўлими муносабати билан таъзия изҳор этаман. Ишонтириб айтаманки, шаҳидларимиз ва ярадорларимизнинг қони ўчмайди", - деди Валиев.

Ўзи нима бўлди
12 июль куни Озарбайжоннинг шимоли-ғарбидаги Товуз туманида икки республиканинг қўшинлари ўртасида тўқнашувлар бошланди. Озарбайжон Мудофаа вазирлиги Арманистон сулҳни қўпол равишда бузганлигини ва Озарбайжоннинг позицияларини артиллериядан ўққа тутганлигини билдирди. Вазирлик маълумотларига кўра, йўқотишлар ҳар икки томонга ҳам этказилган.

Арманистон Мудофаа вазирлигининг маълум қилишича, бир гуруҳ Озарбайжон аскарлари сабабсиз УАЗ русумли юк машинасида мамлакат чегарасини кесиб ўтишга уринганлар. Арманлар томонидан ўт очилиши тўғрисида огоҳлантирилгандан сўнг, ҳарбийлар машинани ташлаб, ўз жойларига қайтишди, аммо тез орада ўққа тутила бошладилар ва "таянч нуқтани эгаллаб олишга уринишни такрорладилар". Вазирлик маълумотларига кўра, арман бўлинмалари зарар кўрмаган, озарбайжонликлар эса талафот кўрган.

13 июль куни иккала томон ҳам яна отишма ҳақида хабар беришди. Арманистон Мудофаа вазирлиги матбуот котиби Шушан Степаняннинг сўзларига кўра, икки-уч соатлик танаффусдан сўнг, Озарбайжон ҳарбийлари ўққа тутишни бошладилар, унга "муносиб жавоб" берилди. Бокуга кўра, Озарбайжон томони артиллерия, миномёт ва танклар ёрдамида арманлар истеҳкомини, ҳарбий техникаларни йўқ қилди, аскарлар орасида кўплаб йўқотишлар бўлган.

Бошқа давлатлар нима дейди
Россия Ташқи ишлар вазирлиги можаронинг янада авж олишини қабул қилиб бўлмайдиган ҳолат деб атади ва томонлардан ўт очишни тўхтатишни сўради. Вазирлик хабарида вазиятни барқарорлаштириш учун зарур ёрдам кўрсатишга тайёрлиги билдирилди.

Европа Иттифоқи ҳам қуролли тўқнашувни тўхтатишга чақирди. "Ўт очишни тўхтатмаслик бу келишилган шартларнинг жиддий бузилиши. Имкони борича ЕҲҲТ майдонларидаги мониторингни қайта тиклаш зарур", - дейилади Европа ташқи хизмати баёнотида. БМТ Бош котиби Антониу Гутерриш Арманистон ва Озарбайжондан ҳарбий ҳаракатларини зудлик билан тўхтатишни талаб қилди.

Икки мамлакат ўртасидаги можаро СССР қулаганидан кейин бошланган. Бунинг сабаби асосан арманлар яшайдиган ва Озарбайжон назорати остидаги Тоғли Қорабоғ ҳудуди эди ва 1991 йилда ушбу ҳудуд Бокудан мустақиллик эълон қилди. 1992-1994 йилларда Озарбайжон ушбу минтақани қайтаришга ҳаракат қилди, лекин охир-оқибат томонлар кейинчалик бир неча бор бузилган сулҳ тузишга рози бўлишди.

Манба: Sof.uz
Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)