Швецияда мактабга қилич билан бостириб кирган эркак отиб ўлдирилди

Швециянинг Фагерста шаҳридаги мактабда қилич билан қуролланган эркак полиция томонидан отиб ўлдирилди. Ҳодиса 21 август куни содир бўлиб, ҳужум оқибатида бир неча киши жароҳат олган. Бу ҳақда Aftonbladet хабар берди.

Дастлабки маълумотларга кўра, эркак мактаб биносига кириб, совуқ қурол билан одамларга ҳужум қилган. Уни қўлга олиш чоғида полиция ўқотар қурол ишлатган ва гумондор воқеа жойида ҳалок бўлган.

Швеция полицияси Фагерстада махсус операция ўтказилганини тасдиқлаган, бироқ тергов манфаатларини инобатга олиб ҳодисанинг айрим тафсилотлари ҳозирча ошкор қилинмаган.

Воқеадан сўнг шаҳардаги бир нечта мактаб ва жамоат бинолари вақтинча ёпилди. Ота-оналар фарзандлари билан боғланишга шошилгани сабабли ҳудудда қисқа муддатли саросима юзага келган. Расмийлар вазият тўлиқ назорат остида эканини маълум қилган.