Пентагон НУЖларни ўрганиш бўйича махсус гуруҳ ташкил этади

^{Фото: oane.ws}
АҚШ мудофаа вазирлиги аномал “ҳаво ҳодисалари”ни тергов қилади ва ўрганади. Пентагон бу мақсадда махсус гуруҳ ташкил этади. Расман бу ҳақда бир неча кундан кейин эълон қилинади, деб хабар берди Пентагондаги манбаларга таяниб CNN телеканали.

Гуруҳ америкалик ҳарбий учувчилар кузатган номаълум учар жисмларни (НУЖ) ўрганади. Маълумотларга кўра, ушбу лойиҳани мудофаа вазирининг биринчи ўринбосари Дэвид Норквист назорат қилади. Пентагон ҳозирча бу маълумотга изоҳ бермаган.

АҚШ конгресси июлда НУЖлар юзасидан хавотир билдирган. АҚШ ҳукуматида НУЖлар одамлар томонидан яратилган бўлиши ва эҳтимолий рақиблар томонидан разведка учун қўлланиши мумкинлиги айтилган.

Июнь ойида АҚШ президенти Дональд Трамп НУЖлар ва Розуэлл ҳодисаси деб аталувчи, 1947 йил 4 июлда юз берган ҳодиса ҳақидаги материаллардан махфийлик муҳрини олиб ташлаш ҳақида ўйлаб кўришини айтган. Ўшанда Нью-Мексико штатидаги Розуэлл авиабазаси яқинидаги ранчода АҚШ ҳарбий-ҳаво кучларининг “Могул” деб номланган махфий лойиҳаси доирасида қўлланган ҳаво шари қулаган. У собиқ иттифоқ ўтказган ядро синовларидан тарқалган товуш тўлқинларини қайд қилиш учун қўлланган. Ҳарбийлар бу ҳодисани яширишган, бу эса дастлаб маҳаллий, сўнгра миллий ОАВларда номаълум объект ўзга сайёраликларга тегишли эканлиги ҳақида миш-мишлар пайдо бўлишига олиб келган.

Апрель охирида Пентагон АҚШ ҳарбий-денгиз кучларининг НУЖлар билан боғлиқ видеоёзувларини эълон қилган. Уларда номаълум деб таснифланган ҳаво ҳодисалари қайд қилинган. Гап АҚШ ҳарбий самолётлари экипажлари томонидан 2004 йил ноябрда ва 2015 йил январда тасвирга олинган кадрлар ҳақида бормоқда. Бу роликлар интернетда 2007 ва 2017 йилларда пайдо бўлган, бироқ Пентагон уларни эълон қилишга рухсат бермаган. Кейинроқ мудофаа вазирлиги ушбу видеоёзувлар ҳақиқийлигини тан олган. «Замин» янгиликларини «Вконтакти»да кузатиб боринг