Гондурас президенти наркобаронлар билан алоқадорликда айбланди

^{Фото: AP Photo}
Манҳэттен округ судида гондураслик наркобарон иши бўйича олиб борилаётган судда айбланувчи йиллар давомида мамлакат президентлари ва вице президентига бир миллион доллардан ортиқ пул берганини таъкидлади. Бу ҳақда «РБК» хабар берди.

Жиноий тўданинг собиқ раҳбари Дэвис Лионель Марадиганинг сўзларига кўра, Los Cachiros картели президент Хуан Орландо Эрнандеснинг синглиси Ҳильда Эрнандесга 2012 йилда 250 минг доллар нақд пул берган. Ўша пайтда Эрнандес конгрессмен ва президентликка номзод эди.

Кўрсатмада айтилишича, яна 50 минг АҚШ долларини 2014 йили Хуан Орландо президент бўлганидан кейин, унинг акаси Хуан Антонио Эрнандес картеллар томонидан бошқариладиган компаниянинг шартномалари учун олган.

Шунингдек, Марадиганинг айтишича, у 2012 йил президентликка номзод бўлган Гондурас вице-президенти Рикардо Альваресга ярим миллион доллар тўлаган, бундан ташқари, амакиваччасини хавфсизлик вазири лавозимига тайинлаши учун мамлакат собиқ президенти Мануэль Селайяга ярим миллион доллар пул берган, лекин келишув амалга ошмаган.

Хуан Орландо Эрнандес айбловларни рад этиб, уларнинг сохталигини айтмоқда.

«Ҳаммаси режалаштирилган! Судья Кевин Кастел фош этилган сохта аудио ёзувнинг ортида ким турганини текширишни буюрди, бу менга қарши фитна борлигини аниқ исботлайди», — деди сиёсатчи ўзининг Twitter саҳифасида.

Эрнандес 2014 йилда Гондурас президенти бўлган. У наркокартеллар ва тўдаларга қарши қаттиқ сиёсат олиб бораган. 2018 йилнинг ноябрь ойида Эрнандеснинг акаси Хуан Антонио АҚШ ҳукумати томонидан Майамида ҳибсга олинган. Ҳибсга олиш сабаблари ошкор қилинмаган, лекин Reuters хабарига кўра, Хуан Антонио Cachiros наркокартели билан алоқадорликда гумон қилинмоқда. “Замин” янгиликларини “Одноклассники”да кузатиб боринг