Француз элчиси Австралия ҳукумати ҳаракатини хоинлик деб атади

Австралиянинг сувости кемалари бўйича Франция билан тузган шартномани бекор қилиши икки давлат ўртасида можарога сабаб бўлди: Канберрадан чақириб олинган француз элчиси Жан-Пьер Тебо Австралия ҳукуматининг ҳаракатини хоинлик деб баҳолади.

«Бизда бунга (яъни шартномани бекор қилишга) 18 ой давомида тайёргарлик кўрилгани ҳақида ишончли маълумотлар бор», – деди элчи The Sydney Morning Herald нашрига берган интервьюсида.

Тебонинг айтишича, Австралия Мудофаа вазири Питер Даттон шартноманинг бузилиши ҳақида ОАВда хабарлар тақалганидан кейингина франциялик ҳамкасби билан боғланган. Шунингдек, у Австралия билан каттароқ лойиҳаларни амалга ошириш режалаштирилганини айтиб, ҳозирги вазиятда Франциянинг орқасидан пичоқ санчилганини таъкидлади.

Эслатиб ўтамиз, Австралия, Британия ва АҚШ 15 сентябрь куни хавфсизлик соҳасида янги ҳамкорлик – AUKUSга асос солинганини эълон қилди. Ҳамкорлик доирасида Австралия Америка технологияси ёрдамида саккизта атом сувости кемаси қуради. Бунинг учун эса Франция билан тузилган йирик шартнома бекор қилинди. «Замин»ни Telegram’да ўқинг!