17:21 / 24.09.2021
1 922

Эмомали Раҳмон афғонистонлик тожикларни Афғонистон ҳукуматини тузишда иштирок этишга чақирди

Эмомали Раҳмон афғонистонлик тожикларни Афғонистон ҳукуматини тузишда иштирок этишга чақирди
Фото: Тожикистон президенти матбуот хизмати
Тожикистон президенти Эмомали Раҳмон Бирлашган Миллатлар Ташкилоти (БМТ) Бош ассамблеясининг 76-сессияси иштирокчиларига йўллаган видеомурожаатида Афғонистоннинг инклюзив ҳукуматини, жумладан, афғонистонлик тожикларнинг иштироки билан тузишга чақирди.

«БМТ Хавфсизлик Кенгаши томонидан террорчи гуруҳлар рўйхатига киритилган ‘Толибон’ ҳаракатининг ҳокимиятга келиши минтақада шундоқ ҳам чигал геосиёсий жараённи янада мураккаблаштирди», — деди Раҳмон.

Тожикистон президенти толиблар инклюзив ҳукумат тузиш ҳақидаги ваъдасини бажара олмаганидан афсусда эканини билдирган.
Унинг айтишича, афғон жамиятининг барча қатламлари, шу жумладан, афғонистонлик тожиклар иштирокидаги мулоқотгина ушбу мамлакатда мустаҳкам тинчлик ва барқарорлик ўрнатилишига олиб келиши мумкин.

«Афғонистондаги тожиклар аҳолининг 46 фоизидан кўпроғини ташкил этади, шу сабабли улар мамлакатнинг бошқа этник гуруҳлари қаторида, давлат бошқарувида муносиб ўрин эгаллаш ҳуқуқига эга», — таъкидлади Тожикистон раҳбари.

У Афғонистон халқига нисбатан барча қонунбузарликлар, қотилликлар, талончиликлар ва зулмларни қоралади ҳамда Панжшер вилоятидаги оғир гуманитар вазият ҳақида гапириб, у ерда ҳақиқий гуманитар фалокат содир бўлганини айтди.

Эмомали Раҳмон Тожикистоннинг Афғонистон ички ишларига аралашмаслигини айтиб, «бу мамлакатда ҳукумат тузилишини референдум орқали, шунингдек, мамлакатнинг барча фуқаролари позициясини ҳисобга олган ҳолда аниқлашни» таклиф қилди.

Тожикистон президенти аввал ҳам Афғонистонда ушбу мамлакатдаги тожиклар жамоатчилиги иштирокида инклюзив ҳукумат тузишни таклиф қилганди.

7 сентябрь куни «Толибон» ҳаракати Афғонистон ҳукуматининг янги таркибини эълон қилганди. Муҳаммад Ҳасан Оҳунд «Толибон» тузган янги ҳукуматнинг раҳбари бўлди. Мулла Абдул Ғани Бародар бош вазир ўринбосари бўлди. «Ҳаққоний тармоғи» гуруҳи асосчисининг ўғли Сирожиддин Ҳаққоний эса ички ишлар вазири лавозимини эгаллади. «Толибон» асосчиларидан бирининг ўғли Умар Ёқуб мудофаа вазири бўлди.

Европа Иттифоқи Афғонистон муваққат ҳукумати таркибидан хавотир билдирди. Иттифоқ фикрича, «Толибон» инклюзив ҳукумат тузиш ҳақидаги ваъдасини бажара олмаган.

arenda kvartira tashkent


Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Янгиликлар » Дунё » Эмомали Раҳмон афғонистонлик тожикларни Афғонистон ҳукуматини тузишда иштирок этишга чақирди