Зеленский Россия билан музокаралар натижаларини баҳолади

^{Фото: «ТАСС»}
Россия билан музокаралар давомида Украина хоҳлаган натижага эришиш имкони бўлмади. Бу ҳақда Украина президенти Владимир Зеленский Telegram-канали орқали йўллаган мурожаатида маълум қилди.

«Ҳозирча биз эришмоқчи бўлган натижамизни олганимиз йўқ», — дейди у.

Шу билан бирга, унинг таъкидлашича, музокараларда Россия томони ўз позициясини эълон қилган, Украина эса «урушни якунлаш бўйича» талабларини илгари сурган. «Россия томонининг айрим сигналларини биз олдик», — дея қўшимча қилади Зеленский.

Украина ва Россия делегациясининг махсус операциялар бошланганидан кейинги биринчи учрашуви 28 февраль куни Беларуснинг Гомел вилоятида бўлиб ўтди. Хавфсизлик нуқтаи назаридан учрашувнинг аниқ жойи ошкор этилмади.

Музокараларда Россия томонидан собиқ маданият вазири Владимир Мединский, мудофаа вазири ўринбосари Александр Фомин, Россия Давлат думасининг халқаро ишлар бўйича қўмитаси раҳбари Леонид Слуский ва Россиянинг Беларусдаги элчиси Борис Гризлов иштирок этди.

Украина томонидан эса музокараларда мудофаа вазири Алексей Резников, «Халқ ноиби» партияси вакили Давид Арахамия, президент офиси раҳбарининг маслаҳатчиси Михаил Подоляк, ТИВ раҳбари ўринбосари Николай Точиский, Киев делегацияси раҳбарининг уч томонлама алоқа гуруҳидаги биринчи ўринбосари Андрей Костин ва халқ депутати Рустем Умеров қатнашди.

Музокаралар, тахминан, беш соат давом этди. Подолякнинг сўзларига кўра, муҳокамаларнинг асосий мавзуси ўт очишни ва Украинадаги ҳарбий ҳаракатларни тўхтатишга қаратилган.

Зеленский, Музокара натижаси, Украина, Россия, Ҳарбий ҳаракатлар Украина ва Россия уруши “Замин” янгиликларини “Инстаграм”да кузатиб боринг