Евроиттифоқ Путиннинг қизларига нисбатан санкция қўллаши мумкин

^{Фото: Forbes}
Европа иттифоқи расмийлари Россия президенти Владимир Путиннинг қизлари экани тахмин қилинаётган Катерина Тихонова ҳамда Мария Воронцовани янги санскиялар рўйхатига киритиш имкониятларини муҳокама қилмоқда. Бу ҳақда Bloombergа хабар тарқатган.

Агентликнинг ўз манбаларига таяниб хабар қилишича, бу «рамзий белги» бўлади, сабаб Тихонова ва Воронцованинг Россиядан ташқаридаги активлари ҳақида маълумотлар деярли йўқ, санкциялар Путиннинг эътиборини жалб қилишга қаратилган.

Россия президентининг қизлари санкциялар рўйхатига киритилиши мумкинлиги ҳақида Twitter’да The Wall Street Journal нашрининг Европа бўйича мухбири Лоуренс Норман ҳам твит ёзган.

Аввалроқ The Wall Street Journal АҚШнинг Россияга нисбатан молиявий санкциялар рўйхатини кенгайтирмоқчилиги, хусусан, ВТБ ва Сбербанкга тақиқлар қўлламоқчилигини ёзганди. Иккала банк ҳам февраль ойида Вашингтоннинг санкциялар рўйхатига киритилган.

6 апрель куни Оқ уй матбуот котиби Жен Псаки АҚШнинг Россияга қарши янги санкциялар жорий этишини маълум қилди. Унинг сўзларига кўра санкциялар Россиядаги молиявий ташкилотлар, мансабдор шахслар ва инвестицияларга нисбатан татбиқ этилади.

Ғарб мамлакатлари Россия февраль охирида Украинада ҳарбий ҳаракатларни бошлаганидан кейин санкциялар эълон қилишни бошлаган, шунингдек, Киев вилоятидаги аҳоли яшаш пунктлари ҳамда Буча шаҳридан россиялик ҳарбийлар чиқиб кетганидан кейин минглаб тинч аҳоли вакилларининг жасадлари топилганидан сўнг Ғарбнинг Москвага нисбатан тақиқлари сони ортган. Россия расмийлари Бучадаги одамларнинг ўлимига алоқадорлигини инкор этмоқда.

4 апрелда Оқ уй Россияга нисбатан янги санкциялар шу ҳафтанинг ўзида жорий этилишини эълон қилди. 5 апрелда Еврокомиссия янги чекловлар бўлишини билдирди. Комиссия Россиянинг тўртта банкига нисбатан транзакцияларни тақиқлаш, бир қатор жисмоний шахсларга жорий қилинган чекловларни янада кенгайтиришни муҳокамаларга қўяди. “Замин” янгиликларини “Facebook”да кузатиб боринг