Наманганда ИИБ хизмат машинасига урилган Matiz ағдарилиб кетди

Наманган вилояти Тўрақўрғон туманида 28 апрель куни учта машина иштирокида йўл-транспорт ҳодисаси содир бўлди. Бу ҳақда вилоят Йўл ҳаракати хавфсизлиги бошқармаси хабар қилди.

Қайд этилишича, ҳолат шу куни соат 15:30 ларда Тўрақўрғон туманидан ўтган 4Р-112 Фарғона ҳалқа йўли автомобиль йўлининг 55-километрида содир бўлган. Lacetti автомашина ҳайдовчиси Чуст—Тўрақўрғон туман йўналишида ҳаракатланиб бораётиб, ҳаракат хавфсизлигини таъминлай олмай, Matiz автомашинанинг орқа томонига бориб урилган. Оқибатда Matiz ҳайдовчиси бошқарувни йўқотиб, қарама-қарши тарафдан ҳаракатланиб келаётган вилоят ИИБ ЙҲХБнинг хизмат автомашинасининг чап томонига бориб урилиб, ағдарилиб кетган.

Ҳодиса вақтида машинада ҳайдовчидан ташқари яна икки нафар йўловчи бўлган. Йўловчилар турли тан-жароҳати билан шифохонага олиб борилган.
Ҳозирда ҳолат юзасидан қўшимча суриштирув ишлари олиб борилмоқда. «Замин»ни Telegram’да ўқинг!