Ўзбекистонда ички туризмни ривожлантиришга масъул ташкилотлар белгиланди

«Ўзбекистон бўйлаб саёҳат қил!» дастури доирасида ички туризмни ривожлантириш учун масъул ташкилотлар белгиланди. Бу ҳақда Туризм ва маданий мерос вазирлиги хабар қилди.

Қайд этилишича, қуйидагиларга туризм йўналишлари бўйича масъул ташкилот ваколатлари берилган:

• Ёшлар ишлари агентлиги, Олий ва ўрта махсус таълим вазирлиги, Халқ таълими вазирлиги — ёшлар, айниқса, таълим муассасалари ўқувчи-талабалари учун туризмнинг тарихий билим берувчи, маданий-кўнгилочар, экстремал, экологик, этно ва пляж туризми турлари бўйича;
  
• Ўзбекистон касаба уюшмалари федерацияси ҳамда Маҳалла ва нуронийларни қўллаб-қувватлаш вазирлиги — меҳнат, маҳаллалар жамоалари учун туризмнинг ишбилармонлик, экстремал, экологик, агро, этно, гастрономик турлари бўйича;
  
• Оила ва хотин-қизлар давлат қўмитаси, Тиббий-ижтимоий хизматларни ривожлантириш агентлиги — хотин-қизлар учун туризмнинг зиёрат, маърифий, ижтимоий, маданий-кўнгилочар, экологик, этнотуризм турлари бўйича;
  
• Маҳалла ва нуронийларни қўллаб-қувватлаш вазирлиги ва «Нуроний» жамғармаси — фахрийлар, нуронийлар ва пенсионерлар учун зиёрат, тиббиёт, соғломлаштириш туризми.

Президентнинг «Ички туризм хизматларини диверсификация қилишга оид қўшимча чора-тадбирлар тўғрисида»ги қарорига кўра, юқорида номлари келтирилган масъул ташкилотлар ўз йўналишлари бўйича ҳар йили иш берувчилар билан биргаликда ходимларни республика бўйлаб саёҳатга чиқиши учун саёҳат графикларини тасдиқлаш ҳамда саёҳатни амалга оширишни таъминлаши керак бўлади.

Қарор билан «Ўзбекистон бўйлаб саёҳат қил!» дастури доирасида ички туризмни ривожлантиришни мувофиқлаштириб бориш учун масъул этиб Туризм ва маданий мерос вазирлиги ҳамда Қорақалпоғистон Вазирлар Кенгаши, вилоятлар ва Тошкент шаҳар ҳокимликлари белгиланган. «Замин» янгиликларини «Вконтакти»да кузатиб боринг