Аҳолини тадбиркорликка жалб қилиш учун субсидиялар берилади

Аҳолини Тадбиркорликка жалб қилиш жамғармаси маблағлари ҳисобидан қатор мақсадлар учун субсидиялар ажратилади. Бу ҳақда “Ҳуқуқий ахборот” канали хабар бермоқда.

Қайд этилишича, қуйидаги мақсадлар учун субсидиялар ажратилади:

• енгил конструкцияли иссиқхоналар ўрнатиш учун 9 млн сўмгача миқдорда;
  
• суғориш воситалари харид қилиш учун 3 млн сўмгача миқдорда;
  
• уруғликлар ва кўчатлар сотиб олиш учун 900 минг сўмгача миқдорда;
  
• ишсиз фуқаролар, кам таъминланган оилалар аъзолари ва ташқи меҳнат миграциясидан қайтиб келган шахсларга улар бандлигини таъминлаш мақсадида ташкил этиладиган қишлоқ хўжалиги кооперативлари устав фондига улуш сифатида киритиш учун 3 млн сўмгача миқдорда;
  
• “Ўзбекипаксаноат” уюшмаси таркибидаги қўлда гилам ва ипак мато тўқиш билан шуғулланувчиларга учтадан кам бўлмаган иш ўрни яратиш шарти билан гилам ва ипак мато тўқиш дастгоҳини харид қилишга сарфланадиган харажатларни қоплаш учун ҳар бир дастгоҳга 3 млн сўмгача миқдорда;
  
• “Яйлов хўжалигини ривожлантириш” уюшмаси аъзоларига қўл меҳнати учун ускуналар харид қилиш бўйича харажатларни қоплаш учун камида битта иш ўрни яратиш шарти билан 3 млн сўмгача миқдорда;
  
• 2025 йил 1 январгача жисмоний шахслар аҳоли хонадонларида балиқ етиштириш йўналиши бўйича ўқув курсларида ўқиш харажатларини қоплаш учун 600 минг сўмгача миқдорда бир марталик;
  
• тадбиркорлик ва ўзини ўзи банд қилиш фаолиятини бошламоқчи бўлган ишсиз, “Темир дафтар”, “Аёллар дафтари” ва “Ёшлар дафтари”га киритилган фуқароларга фаолиятини бошлаш учун керак бўлган асбоб-ускуна, меҳнат қуролларини харид қилиш учун 7 миллион сўмгача, хотин-қизларга 10 миллион сўмгача;
  
• тадбиркорлик фаолиятини бошлаётган ишсиз фуқароларга тадбиркорлик субъекти сифатида давлат рўйхатидан ўтгандан сўнг дастлабки уч ой мобайнида олинган бино ва иншоотнинг ижара тўловини тўлаш учун 3 млн сўмгача миқдорида;
  
• ҳунармандлар “Ҳунарманд” уюшмасига аъзолик бадали харажатлари учун аъзолик бадали миқдорида;
  
• аҳоли бандлигига кўмаклашиш марказида рўйхатдан ўтган, тадбиркорлик фаолиятини бошлашни хоҳлаётган ишсиз шахсларга якка тартибдаги тадбиркор сифатида рўйхатдан ўтиш, кичик корхоналар ва микрофирмаларни давлат рўйхатидан ўтказиш учун сарфланадиган харажатларни тўлашда бир марталик;
  
• “уста-шогирд” анъаналари асосида ёшларга ҳунар ўргатаётган ҳунармандларга (кулолларга) шогирдлар тайёрлаш, зарур хомашё сотиб олиш ва шогирдларни иш ҳақи билан таъминлаш учун 6 ой давомида ҳар ойда 600 минг сўмдан кам бўлмаган миқдорда;
  
• шогирдларга мустақил фаолият бошлаши учун зарур асбоб-ускуна ва жиҳозларни сотиб олиш, усталарга сайтларини ташкил этиш, ўз маҳсулотларини жаҳон электрон савдо майдончаларига чиқариш ва реклама харажатлари 50 фоизи, бироқ 7,5 млн сўм миқдоридан ошмайдиган қисмига субсидия ажратилади.

“Замин” янгиликларини “Youtube”да кузатиб боринг