12:05 / 11.09.2022

Атеистлар шундай қармоқ ташлайди

Атеизм устунларининг оддий одамлар кўзини боғлайдиган, лекин аҳли илм тирсагидан тутиб қоладиган қуйидагича фириблари бўлади:

1. Хос ишни умумлаштириш. Аёлларни уриш ҳақидаги сарказмдан унумли фойдаланганлари каби.

2. Умумий ишни хослашлик. Умматнинг ютуқ ва устунликларини айрим давр ва шахсларгагина хослаб қўйишлари каби.

3. Аслида бўлмаган нарсаларга қўшимча ва ўзгартишлар зиёда қилиш. Айрим аҳкомларни ёмонотлиқ қилишда бу усулдан кўп фойдаланишади.

4. Лозим бўлган қайд ва шартларни ўчириш. Бундай ўчириш ҳақиқатнинг ўзгаришига олиб боради. Масалан кўпхотинлилик масаласида бу услублари қўл келади.

5. Ҳақни ботил қилиш ва ботилни ҳаққа чиқариш мақсадида диний матнларни хоҳишга кўра талқин қилиш. Бунга мисоллар уларнинг даъволарида тиқилиб ётибди.

6. Асосида ихтилофли бўлган тушунчаларни тарқатиш. Минглаб китоблар ичидан ўзларига ёққан ихтилофли масалани кўтариб чиқиб, исломда шундай дея талқин қилишлари кўп кузатилган. Ваҳоланки бу ихтилофларнинг атеистларга дахлдор бўлмаган ва умматга фойдали сабаблари бўлади.

7. Айрим уламоларнинг заиф ижтиҳодларини, ислом мана шу, дея тақдим қилиш. Ваҳоланки бу ижтиҳод бошқа мужтаҳидлар ва ёки жумҳур уламо томонидан рад қилинган бўлади.

8. Исломга нисбат бериладиган айрим фирқаларда мавжуд нодир ва нотўғри тушунчаларни териб юриш ва уни мусулмонлар тан олган исломий тушунча, дея мутлақлаштириш. Ваҳоланки ислом ундай тушунчалардан ҳақ ботилдан бариъ бўлгандек топ-тоза бўлади.

9. Баъзи сўз ё матнларни муаллифи ё ровийсидан бошқага нисбат бериш. Бу илмий хиёнатдан юзлари қизармай фойдаланишади.

10. Саҳиҳ қавлларни яшириш ва билиб туриб кўрмаганга олиш. Бунда кўзлаган мақсадлари амалга ошмай қолишидан қўрқиш бош омил бўлади.

11. Моддий илмлар атеистик илмлар эканини шипшитиш. Ваҳоланки воқеълик бунинг тескариси эканини кўрсатади.

Атеистларнинг бундай алдов ва фириблари рўйхатини яна давом эттириш мумкин.

Мусулмон ўз дини ва борлиқ ҳаётни яхши ўрганса, уларнинг бу тузоғига тушмайди. Атеистларнинг уммат ва унинг тарихига хиёнатидан огоҳ бўлади. Уларнинг ҳақиқат душманлари - инс шайтонларига ақл ва қалбларини сотганларини чуқур англайди.

Устоз Мубашшир Аҳмад

Манба: Azon.uz