Аудиоси тарқалган ҳоким барча рағбатлантиришлардан маҳрум қилинди

^{Фото: Наманган ҳокимлиги}
Кеча, 3 декабр куни ушбу масалада Наманган вилояти ҳокими Шавкатжон Абдуразоқов бошчилигида кенгайтирилган муҳокама йиғилиши ўтказилган.

Йиғилишда Янги Наманган тумани ҳокими Ж.Абдуллаевга «ҳайфсан» интизомий жазоси қўлланилиб, барча турдаги рағбатлантиришлардан маҳрум қилинди.

Шунингдек, йиғилишда жорий йил давомида ижтимоий тармоқларда шаҳар ва туманлар ҳокимликлари, вилоят бошқармалари, тегишли ташкилотлар раҳбарларининг хатти-ҳаракатлари бўйича ёритилган масалалар ҳам атрофлича муҳокама қилинган.

Аввалроқ Янги Наманган тумани ҳокими Жобир Абдуллаевнинг тадбиркор Анасхон Дедабаевни куракда турмайдиган сўзлар билан ҳақорат қилган аудиоси тарқалганди.

Блогер Олимжон Ҳайдаровнинг маълум қилишича, Наманган вилояти Наманган шаҳри Янги Наманган тумани ҳокими Жобир Абдуллаев Президент Администрациясига мурожаат қилган тадбиркор Анасхон Дедабаевни куракда турмайдиган сўзлар билан ҳақорат қилган.

Маълум бўлишича, тадбиркор президентга маҳалла биноси, болалар майдончаси, спорт майдончаси, маиший хизмат кўрсатиш дўконлари қуриб беришни ваъда қилган. Аммо бунда кўп сарсонликларга дучор бўлган. Шикоят қилгани учун эса ҳақоратларга учрагани айтилмоқда.

Маълумот учун, Анасхон Дедабоев 2021 йил 19 феврал куни Президентнинг Наманган вилоятига ташрифи чоғида тасодифан Шавкат Мирзиёев билан юз-юз суҳбатлашиб, маҳалласи учун ўз ҳисобидан МФЙ биноси ва мини стадион қуриб беришга ваъда берганди.

Президент «битгач расмлари билан менга хат ёзасан», деганди. Аввалроқ эса тадбиркор маҳалла учун қураётган бино ва стадионни битказгани айтилганди. «Замин» янгиликларини «Вконтакти»да кузатиб боринг