Қашқадарёдаги қишлоқлардан биридаги ҳовлига бўри кириб келди

Ижтимоий тармоқларда Қашқадарё вилояти Кўкдала туманидаги қишлоқларнинг бирига бўри келиб қолгани ҳақида хабар тарқалди. Табиат ресурслари вазирлиги Қашқадарё вилояти бошқармаси матбуот хизмати ҳолат юзасидан маълумот берди.

Қайд этилишича, «Тўқмор» МФЙ да яшовчи фуқаро Н.О.нинг ҳовлисига ёввойи ҳайвон кириб қолганлиги тўғрисидаги мурожаат келиб тушган.

Шундан сўнг, Табиат ресурслари вазирлиги Қашқадарё вилояти бошқармаси ҳамда Кўкдала туман ИИБ ходимлари фуқаронинг ҳовлисига кириб қолган ҳайвон бўри эканлигини аниқлашди.

Шаҳрисабз шаҳрида жойлашган «Зооцирк» хусусий корхонасига хабар берилган. Мутахассис томонидан бўрининг ҳолати ўрганилиб, унинг хулосаси билан табиат қўйнига қўйиб юбориш чоралари кўрилмоқда, дейилади хабарда.

Шухрат Раззаков

«ЗАМИН.УЗ» муҳаррири