“Супер контракт” учун шартнома бериш бошланди

2023/2024-ўқув йили табақалаштирилган тўлов-контракт (супер контракт) миқдорлари ўтган ўқув йили учун белгиланган миқдорларда ўзгаришсиз қолгани тўғрисида хабар берилганди. Telegramъдаги “Таълим назорати” каналининг ёзишича, 8 сентябрдан супер контрактлар учун шартнома бериш бошланди.

Абитуриентлар “kontrakt.edu.uz” сайти орқали супер контрактда ўқиш ҳамда шартнома олиш учун ариза беришлари мумкин.

Амалдаги қонунчилик бўйича, фақат ўзи танлаган биринчи йўналишга супер контракт учун ариза юбориш имконияти мавжуд. Иккинчи ва ундан кейинги йўналишлар базада кўринмайди.

“Супер контрактлар учун имтиёзли таълим кредити ажратилмайди. Тижорат банклари ўз имкониятларига кўра тижорий таълим кредитлари бериши мумкин”, — дейилади хабарда.

Аввалроқ соғлиқни сақлаш вазири Амрилло Иноятов ҳукуматга тиббиётда супер контрактни йўқотиш бўйича таклиф киритилганини айтганди.

“Супер контракт масаласида фикрим ижобий эмас. Тиббиётда ўқиш осонмас. Гап талабанинг ўқишида ва бизнинг филтримизда. Хоҳлаган талаба супер контрактга кириши мумкин, бутун дунёда тенденция шунақа. Энг асосийси, биз филтрни халқаро талаблар даражасида қилиб қўйсак, талабалар ўз-ўзидан филтрланади”, — деган у.

Июль ойида Тошкент давлат иқтисодиёт университети ректор Конгратбай Шарипов “Супер контракт ўзи аслида яхши эмас. У иложсизликдан ўйлаб топилган усул. Лекин бозор иқтисодиётига ўтиш даврида керак”, — деган эди.

Янгиликлар